«قۇمان تاستانبەكوۆپەن قوشتاسۋ ءراسىمى 20 - جەلتوقسان كۇنى تاڭعى 10-دا اكتەردىڭ 1968 -جىلدان بەرى قىزمەت ەتكەن ورنى - م. اۋەزوۆ اتىنداعى قازاق اكادەميالىق دراما تەاترىندا وتەدى»، - دەلىنگەن باسقارما حابارلاماسىندا.
تانىمال قازاقستاندىق اكتەر قۇمان تاستانبەكوۆ 72 جاسىندا اقتاۋ قالاسىندا دۇنيە سالدى. اكتەر ماڭعىستاۋ وبلىسىنداعى تۋىستارىنا قوناققا بارعان.
جەكسەنبى كۇنى 17 - جەلتوقساندا قۇمان تاستانبەكوۆتىڭ ءمايىتى اقتاۋدان الماتىعا ۇشاقپەن جىبەرىلدى. مارقۇمنىڭ ءمايىتىن شىعارىپ سالۋعا ماڭعىستاۋ وبلىسىنىڭ اكىمى ەرالى توعجانوۆ پەن جەرگىلىكتى زيالى قاۋىم وكىلدەرى جانە قالا تۇرعىندارى اۋەجايعا جينالدى.
اۋەجايدا ماڭعىستاۋ وبلىسىنىڭ اكىمى ەرالى لۇقپان ۇلى مارقۇمنىڭ ومىرلىك جارى مەرۋەرت قاراتاي قىزىنا، بالالارى مەن اعايىن- باۋىرلارىنا جانە اكتەردىڭ ونەرىن قاستەرلەپ، ازاماتتىق تۇلعاسىن قادىر تۇتقان بارشا قاۋىمعا ماڭعىستاۋ جۇرتشىلىعىنىڭ اتىنان كوڭىل ايتتى.
ەسكە سالا كەتەيىك، بۇگىن مەملەكەت باسشىسى نۇرسۇلتان نازاربايەۆ كورنەكتى تەاتر جانە كينو اكتەرى، قازاقستاننىڭ حالىق ءارتىسى قۇمان تاستانبەكوۆتىڭ قايتىس بولۋىنا بايلانىستى تۋىستارى مەن جاقىندارىنا كوڭىل ايتۋ جەدەلحاتىن جولدادى.
جەدەلحاتتا ق. تاستانبەكوۆتىڭ وتاندىق تەاتر جانە كينو ونەرىن دامىتۋعا، سونداي- اق جاس ۇرپاقتى تاربيەلەۋگە قوسقان زور ۇلەسى اتاپ كورسەتىلگەن.
«ونىڭ جارقىن بەينەسى مەن ۇلت ونەرىنە سىڭىرگەن ەڭبەگى حالىق جادىندا ءارقاشان ساقتالاتىنىنا سەنىمدىمىن»، - دەلىنگەن جەدەلحاتتا.
قۇمان تاستانبەكوۆ 1945 -جىلى بۇرىنعى تالدىقورعان وبلىسىندا دۇنيەگە كەلگەن. قازاقستاننىڭ حالىق ءارتىسى، قازاقستان لەنيندىك كومسومول سىيلىعىنىڭ لاۋرەاتى، «قۇرمەت» ، «پاراسات» وردەندەرىنىڭ يەگەرى.
1969 -جىلى قازاق مەملەكەتتىك قۇرمانعازى اتىنداعى كونسەرۆاتوريانىڭ تەاتر فاكۋلتەتىن بىتىرگەن.
ق. تاستانبەكوۆتىڭ كينو ونەرى سالاسىنداعى ەڭبەگى دە ەلەۋلى. ول اتاقتى «قىز جىبەك» فيلمىندەگى تولەگەن رولىمەن «جۇلدىزى جانعان» اكتەر. بۇدان كەيىن دە كوپتەگەن فيلمگە - «بىزدىڭ عاني» (1971)، «مۇندا اققۋلار ۇشىپ كەلەدى» (1973)، «اققۋلار جاڭعىرىعى» (1974)، «قوسىمشا ساۋالدار» (1978)، «اعامنىڭ قالىڭدىعى» (1979)، «پروۆينتسيالدى رومان» (1981)، «قاراشا قازدار قايتقاندا» (1981)، «ورنەك» (1982)، «الاڭ جيەگىندە» (1982)، «كىمسىڭ سەن، سالت اتتى؟» (1987)، «ادام- جەل» (2003)، «ماحامبەت» (2008) ت. ب. تۇسكەن.
اۆتور: ايجان سەرىكجان قىزى