جاپونيا 20 دان استام تەليەۆيزيالىق ءونىمىن قازاقستانعا تەگىن ۇسىنادى
بۇل تۋرالى بۇگىن ەلوردادا وتكەن باسپا ءسوز ءماسليحاتى بارىسىندا «Japan Foundation» پرەزيدەنتى حيروياسۋ اندو ايتتى، دەپ حابارلايدى قازاقپارات.
ورتالىق ازيا ەلدەرىمەن مادەني ءوزارا ءىس-قيمىل جونىندەگى جاپوندىق ميسسيا باسشىسىنىڭ ايتۋىنشا، ولار وزبەكستان، قىرعىزستان، تۇرىكمەنستان، تاجىكستان ەلدەرىندە بولىپ، سوڭىندا قازاقستانعا كەلگەن. ەلوردامىزداعى ساپارلارى بارىسىندا بەيبىتشىلىك پەن كەلىسىم سارايىنا، ازىرەت سۇلتان مەشىتىنە بارىپ، قازاقستاننىڭ تاريحي جانە مادەني مۇرالارىمەن كەڭىنەن تانىسقان.
«ەرتەڭنەن باستاپ قازاقستاننىڭ ۇكىمەت مۇشەلەرىمەن كەزدەسۋدى جوسپارلاپ وتىرمىز. اتاپ ايتقاندا، قازاقستاننىڭ مادەنيەت جانە سپورت مينيسترىمەن، سىرتقى ىستەر ءمينيسترىنىڭ ورىنباسارىمەن جۇزدەسۋىمىز جوسپارلانعان. كەلىسسوزدەر بارىسىندا مادەنيەت سالاسىنداعى ەكى ەلدىڭ ىنتىماقتاستىعىن دامىتۋعا بولاتىن باعىتتاردى ايقىندايمىز دەپ ويلايمىن. دەگەنمەن، استاناعا كەلگەننەن كەيىن ءوزىمىزدىڭ كەڭەسىمىزدى وتكىزىپ، قازاق-جاپون اراسىنداعى ديالوگتى ودان ارى دامىتۋعا مۇمكىندىك بەرەتىن ەكى باعىتتى ايقىنداپ الدىق»، - دەدى ول.
ونىڭ ايتۋىنشا، ەڭ بىرىنشىدەن، ەكى ەلدىڭ اراسىنداعى گۋمانيتارلىق الىس-بەرىسكە تىڭ سەرپىن بەرەتىن قازاقستاندىق ساراپشىلارمەن جۇمىستى جانداندىرۋعا باسا نازار اۋدارىلاتىن بولادى.
ەكىنشى باعىتتا قازاقستان مەن جاپونيا اراسىنداعى مادەني بايلانىستاردى كۇشەيتۋگە ءمان بەرىلەدى. مۇنان بولەك، جاپونتانۋشىلاردى، جاپون ءتىلىن ۇيرەتۋشىلەردى دايىنداۋعا كوڭىل بولىنبەك.
«سونىمەن قاتار تەليەۆيزيالىق كونتەنتتى ۇسىنۋ باعىتىنداعى ىنتىماقتاستىقتى دا جولعا قويۋعا بولادى دەپ ەسەپتەيمىز. جالپى، بۇل ەكىجاقتى ىنتىماقتاستىقتى دامىتۋ بارىسىندا باسا ءمان بەرەتىن باعىتتارىمىزدىڭ ءبىرى. ءبىز 20 دان استام تەليەۆيزيالىق جوبانى قازاقستاندىق تاراپقا ۇسىنۋدى جوسپارلاۋدامىز. ونىڭ ىشىندە تەليەۆيزيالىق سەريالدار مەن دەرەكتى فيلمدەر بار. بۇل كونتەنتتەردى كورسەتۋ قۇقىعىن جاپونيانىڭ ورتالىق ازيا ەلدەرىمەن مادەني ءوزارا ءىس-قيمىل جونىندەگى قورى ساتىپ العان. سوندىقتان بۇل ۇسىنىستارىمىزعا قازاقستاندىق تاراپ قىزىعۋشىلىق تانىتاتىن بولسا، وندا ولاردى قازاقستانداعى جاپونيا ەلشىلىگى ارقىلى تەگىن بەرەمىز. سۋبتيترى ورىس تىلىندە بولادى. ونى جاساۋ جۇمىستارىن دا ءوز موينىمىزعا الامىز»، - دەدى ول.
ميسسيا باسشىسىنىڭ ايتۋىنشا، جاپون تاراپى دا قازاقستاندىق تەلەارنالاردىڭ ونىمدەرىن الۋعا قىزىعۋشىلىق تانىتادى. «بۇل ماسەلەنى قازىرگى ۋاقىتتا تىڭعىلىقتى قاراستىرىپ جاتىرمىز. ەرتەڭ «قازاقستان» تەلەارناسىنىڭ باسشىسى ەرلان قارينمەن كەزدەسۋ بارىسىندا تالقىلايتىن بولامىز»، - دەدى اندو.
اۆتور: مارلان جيەمباي