الەم سىرىن اشا الماعان 20- عاسىردىڭ ەڭ اتىشۋلى وقيعالارى - فوتو
XX عاسىردىڭ سىرى اشىلماعان ەڭ اتىشۋلى وقيعالارى مەن ولاردىڭ كەيىپكەرلەرىن نازارلارىڭىزعا ۇسىنامىز.
لەدي- اجە
مىنا سۋرەت 1963 -جىلدىڭ 22 - قاراشاسىندا داللاستا تۇسىرىلگەن. امەريكا پرەزيدەنتى دج. كەننەديگە ۆينتوۆكادان وق اتىلعان ءسات. اۋىر جارالانعان پرەزيدەنتكە كومەككە ۇمتىلعان ادامداردىڭ ىشىندە تەك مىنا ءبىر جۇمباق ايەل عانا سالقىنقاندىلىقپەن وقيعا بارىسىن كامەراسىنا ءتۇسىرىپ تۇر. جۋرناليستەر بۇل ايەلدى لەدي اجە اتاپ كەتكەن، ويتكەنى ورىستىڭ اپالارى سياقتى باسىنا ورامال بايلاپ العان. سول قايعىلى وقيعادان بەرى بۇل بەيتانىس ايەل تۇسىرگەن سۋرەتتەردى ەشكىم كورمەگەن، ءتىپتى ونىڭ كىم ەكەنىن دە انىقتاي الماعان. فەدەرالدى تەرگەۋ بيۋروسىنىڭ پىكىرىنشە، جۇمباق ايەل قىلمىستى باسقا راكۋرستان ءتۇسىرىپ الۋى مۇمكىن، سوندىقتان ونىڭ قولىنداعى كادرلاردىڭ ارقاسىندا ءبىراز نارسەنىڭ بەتى اشىلار ەدى. الايدا بەيتانىس ادام سول كۇيى جۇمباق بولىپ قالا بەردى. سول ساتتە وقيعا ورنىندا بولعان ادامداردىڭ ەشقايسىسى ورامال تاققان ايەلدىڭ كىم ەكەنىن ايتا الماعان.
تاۋرەدتەن كەلگەن قوناق
1954 -جىلى توكيو اۋەجايىندا ۇستىنە كوستيۋم كيگەن ءبىر ەر ادام كۇزەتتىڭ نازارىنا ىلىگەدى. الگى جىگىتتەن سەزىكتەنگەن مەكەمە قىزمەتكەرلەرى ونى توقتاپ، سۇراقتىڭ استىنا الادى. ەر ادام سۇراقتارعا فرانسۋز تىلىندە جاۋاپ بەرگەن، الايدا تاعى بىرنەشە تىلدە ەمىن- ەركىن سويلەيدى ەكەن. ءتولقۇجاتىنا جاپونيانى قوسقاندا، كوپ ەلدىڭ ءمورى باسىلعان. كۇزەتشىلەرگە فرانسيا مەن يسپانيانىڭ اراسىندا ورنالاسقان تاۋرەد دەگەن ءبىر ەلدەن كەلدىم دەگەن. الايدا كارتادان ونىڭ كورسەتكەن جەرى تابىلماعان، تاۋرەد دەپ نۇسقاعان جەردە اندوررا ورىن تەپكەن. بۇعان ول قاتتى قاپالانادى. تاۋرەدتىڭ پايدا بولعانىنا جۇزدەگەن جىل بولعانىن ايتىپ، جەرگىلىكتى كۋالىگى مەن چەكتەردى كورسەتكەن.
اۋەجاي قىزمەتكەرلەرى ەر ادامدى قوناق ۇيگە جايعاستىرىپ، بولمەنىڭ الدىنا كۇزەت قويعان. ال وزدەرى تاۋرەدتەن كەلگەن قوناق جايلى اقپارات تابۋعا كىرىسەدى. بىرەر ۋاقىتتان كەيىن نومىرگە قايتىپ كەلسە، الگى ادام ءىز- ءتۇسسىز جوعالىپ كەتكەن. ەسىك اشىلمايدى، كۇزەتشى دە بولمەدەن شۋ شىقپاعانىن ايتقان، ال تەرەزە ارقىلى شىعۋ تىپتەن مۇمكىن ەمەس - تىم بيىك. تاڭعالارلىعى، اۋەجايدىڭ قاۋىپسىزدىك قىزمەتىنىڭ بولمەسىنەن جولاۋشىنىڭ بۇكىل جۇگى دە جوعالىپ كەتكەن.
د. ب. كۋپەر
1971 -جىلدىڭ قاراشاسىندا پورتلەندتە سيەتلگە بەت العان ۇشاق بورتىنا «د. كۋپەر» دەگەن ەر ادام مىنەدى. قولىندا قارا پورتفەلى بولعان. ۇشاق اۋەگە كوتەرىلگەننەن كەيىن «كۋپەر» ستيۋاردەسسانىڭ قولىنا حات ۇستاتادى. وندا پورتفەلىندە بومبا بار ەكەنى، بيلىكتەن 200000 دوللار مەن 4 پاراشايۋت تالاپ ەتەتىنى تۋرالى جازىلعان. ۇشقىشتار «كۋپەردىڭ» بۇل تالابىن دەرەۋ بيلىكككە جەتكىزەدى. سيەتل اۋەجايىنا قونعاننان كەيىن جولاۋشىلاردىڭ بارلىعى بوساتىلىپ، «كۋپەردىڭ» تالابى ورىندالادى. ءسويتىپ ۇشاق قايتا اۋەگە كوتەرىلەدى. بورتتا ەكيپاجدىڭ ءتورت مۇشەسى مەن شىن اتى- ءجونى بەلگىسىز «كۋپەر» عانا بولعان. نيەۆادا شتاتىنا جەتكەن كەزدە «كۋپەر» ۇشاقتىڭ ەسىگىن اشىپ، اقشانى الىپ، لاينەردەن سەكىرىپ كەتكەن.
ءبىر قىزىعى، ونى تانيتىن جۇزدەگەن كۋاگەردىڭ بولعانىنا قاراماستان، «كۋپەر» سول كۇيى تابىلمادى. ۇشاقتا قالدىرعان گالستۋگى مەن وزەننەن اقشانىڭ ءبىر بولىگى عانا تابىلعان. سودان بەرى ءۇمىتىن ۇزبەي بۇل ءىستى تەرگەپ جاتقان فەدەرالدى بيۋرو تەكسەرىستى وتكەن جىلدىڭ جازىندا عانا توقتاتىپتى.
بەلگىسىز بۇلىكشى
بۇل سۋرەت 1989 -جىلدىڭ ماۋسىمىندا تيانانمەن الاڭىنداعى نارازىلىق كەزىندە تۇسىرىلگەن. بەلگىسىز بۇلىكشى جالعىز ءوزى جارتى ساعات بويى تانكتەردىڭ جولىن كەس- كەستەپ وتكىزبەي قويعان. تانك اينالىپ وتە الماي، اقىرى توقتاۋعا ءماجبۇر بولعان. وسى ساتتە سۋرەتتەگى باتىر تانككە ءمىنىپ، ەكيپاج مۇشەلەرىمەن سويلەسەدى. كوپ ۇزاماي ەر ادام تۇرعان جەرىنە قايتا ورالىپ، تانكتەردىڭ جولىن بوگەۋدى جالعاستىرعان. وسى وقيعادان كەيىن الگى بۇلىكشىگە نە بولعانى، ونىڭ كىم ەكەنى سول كۇيى انىقتالمادى.
ەدگار اللان پونىڭ قۇپيا تابىنۋشىسى
1949 -جىلدان بەرى ەدگار اللان پونىڭ تۋعان كۇنىندە بەلگىسىز بىرەۋ جازۋشىنىڭ قابىرىنە كەلەدى ەكەن. جۇمباق تابىنۋشىنىڭ ۇستىنەن قارا پالتوسىن، باسىنان قالپاعىن تاستاماعان. موينىنا ۇنەمى شارف وراپ نەمەسە كاپيۋشونمەن بەتىن بۇركەپ الاتىن كورىنەدى. ءار كەلگەن كەزىندە قابىر باسىنا 3 قىزىل راۋشان گۇلى مەن كونياكتىڭ اشىلعان بوتەلكەسىن قويىپ كەتەدى- ءمىس. بەلگىسىز تابىنۋشىنىڭ بۇل ارەكەتىن سان ءتۇرلى جورامالداپ جۇرگەندەردىڭ سوزىنە سەنسەك، ءۇش روزا جازۋشى پو، ونىڭ ايەلى ۆيردجينيا مەن قايىن ەنەسى ماريا كلەممگە ارنالعان. ويتكەنى ۇشەۋى دە وسى جەرگە جەرلەنىپتى. ال ءبىر بوتەلكە كونياكتىڭ ءمانى سول كۇيى اشىلمادى، قۇپيا كۇيىندە قالدى. كەيدە جۇمباق ادام حات جازىپ تا قالدىرىپ وتىرعان. دەرەكتەرگە سۇيەنسەك، كىم ەكەنى بەلگىسىز تابىنۋشى 1998 -جىلى قايتىس بولعان.
adme.ru سايتىنان اۋدارىلدى
Baq.kz