قىز جىبەك فيلمى تۋرالى 20 قىزىق دەرەك

نۇر-سۇلتان. قازاقپارات - ەكى جاستىڭ ماحابباتى ارقىلى، ەكى رۋدىڭ ارا- قاتىناسى، سول ارقىلى حالىق ءومىرى مەن تاعدىرى بەينەلەنگەن سۇلتان قوجىقوۆتىڭ «قىز جىبەك» كوركەم فيلمى بۇگىندە قازاق كينوسىنىڭ التىن قورىنا اينالدى.

«قىز جىبەك» فيلمىنىڭ سەناريىن دايارلاۋ، فيلمنىڭ دايىندىق جۇمىستارىن جۇرگىزۋ، فيلمدى ءتۇسىرۋ، مونتاجداۋ كەزىندەگى تولعانىس پەن قيىندىققا تولى ساتتەردەن قىزىق مالىمەتتەردى ۇسىنامىز.

1. «قىز جىبەكتىڭ» العاشقى نۇسقاسى «اققۋ» دەپ اتالعان. كينو تۇسىرىلگەنگە دەيىن فيلم سەناريى 1944 -جىلى، ياعني 10 -جىل بۇرىن جازىلعان. 1967 -جىلى جاڭا سەناريلەردى بەكىتۋ كەزىندە دايىن سەناري رەتىندە ەسكە تۇسەدى.

2. فيلمدى ءتۇسىرۋ ءۇشىن قازىرگى كۇنى كەزدەسپەيتىن 8-10 قاناتتى شاڭقان اق ۇيلەر ارنايى جاسالدى. ءتۇرلى ءتۇستى شي، تازا اق ءجۇن، كەرەگەنى تالدان يۋ ءۇشىن سولقىلداعان جاس بوزتالدار قولدانىلدى.

3. رەجيسسەرلىك سەناري بويىنشا جىبەكتىڭ 10 ءتۇرلى كوستيۋمى بولۋ كەرەك دەپ بەكىتىلدى («اننا كارەنينا» فيلمىندە كارەنينانىڭ 25 ءتۇرلى كوستيۋمى بولعان) .

4. جاساندى، بويالعان ماتەريال ەكراندا ءبىلىنىپ قالادى دەپ كوستيۋمدەرگە قاجەتتى بارقىت، ماقپال، جىبەك، ءشايى، باتسايى، ءپۇلىش، كويلەك- كامزولدى ادىپتەيتىن قۇندىز، سۋسار، ەلتىرى، كيىمدى وقالايتىن جاقات، ءىنجۋ- مارجان قولدانىلدى.

5. ارنايى قاۋلى نەگىزىندە، اۋىل شارۋاشىلىق مينيسترلىگىنە فيلمگە كەرەك تاڭداۋلى 40 ات تاۋىپ بەرۋ جۇكتەلدى.

6. جەكە ادامداردىڭ قولىنان ەر- تۇرمان، ساۋىت- سايمان، كيىز ءۇي جيھازدارى جانە باسقا دا ساتۋدا جوق كىلەم، تەكەمەت، سىرماق سەكىلدى زاتتاردى ساتىپ الۋ ءۇشىن 10 مىڭ سومعا دەيىن اقشا جۇمساۋعا رۇقسات ەتىلدى.

7. الماتىداعى «سۋۆەنير» فابريكاسى قاقتاعان كۇمىستەن، اق جالتىر تەمىردەن باتىرلار مەن قىزداردىڭ كيىمدەرىنە قاجەتتى جۇزدەگەن اشەكەي جاساپ شىعاردى.

8. فيلم سۋرەتشىسى گۇلفايرۋس ىسمايلوۆا باستاعان تاڭداۋلى شەبەرلەر قىزداردىڭ كامزولدارى مەن كويلەكتەرىنە، جۇزدەگەن، مىڭداعان مونشاقتاردى ءبىر- بىرلەپ ءوز قولدارىمەن قاداعان.

9. «قىز جىبەك» گرۋپپاسىنداعى جۇزگە جۋىق ستۋديا قىزمەتكەرلەرى ەكى جىل بويى دايارلىق، ازىرلىك جۇمىستارىن ورىنداپ شىقتى.

10. جىبەك رولىنە 400 گە جۋىق ۇمىتكەردەن ۇسىنىس حات كەلىپ ءتۇستى. ولاردىڭ ىشىندە 15 قىز عانا ىرىكتەۋدەن ءوتىپ، تەك جىبەكتىڭ سەرىكتەرى رەتىندە بەكىتىلدى.

11. رەجيسسەرلەر جىبەك رولىنە لايىقتى قىزدى تاپپاي، ۇزاق ىزەيدى. الماتىنىڭ №66 مەكتەبىندە 10 سىنىپ وقىپ جۇرگەن مەرۋرەت وتەكەشوۆانى رەجيسسەر عازەل ماعاۋينا ستۋدياعا ەرتىپ اكەلگەن.

12. 1969 -جىلى 4 - ساۋىردە كوركەمسوۆەت ءماجىلىسى فيلمنىڭ العاش تۇسىرىلگەن ماتەريالىن تالقىلادى. جيىندا تولەگەن بەكەجاننىڭ قاسىندا ءالسىز، جاسقانشاق كورىنەدى دەپ سىنالدى. شاكەن ايمانوۆ «ءبىزدىڭ كورىپ وتىرعانىمىز - ويسىز الاڭسىز جۇرگەن بىرەۋ» دەسە، عابيت مۇسىرەپوۆ «ول بەكەجاننىڭ قاسىندا ءبىر بيشارا. تولەگەن، قايتالاپ ايتايىن، تىم دارمەنسىز، ءۇمىت از.. .» دەپ سەنىمسىزدىك تانىتقان. دەسە دە سىرباز دا، ىزەتتى تولەگەن ءرولىن قۇمان تاستانبەكوۆ ءوز دەڭگەيىندە الىپ شىقتى.

13. «سىرلىبايدىڭ اۋىلى» دەپ اتالاتىن وبەكتىلەردى ءتۇسىرۋ كەزىندە «قىرىق كوش» ءۇشىن اۋىلداردان 60 تۇيە اكەلىندى؛

14. تاستىڭ باسىنا ەسكى تاڭبالاردى قاشاپ سالۋ ءۇشىن ەكى ۇلكەن كوتەرگىش كران جونەلتىلدى؛

15. ىلە جاعاسىندا «سىرلىباي اۋىلى» ءۇشىن 35 كيىز ءۇي تىگىلدى؛

16. فيلمگە بىشكەك قالاسىنىڭ حايۋاناتتار باعىنان كينوعا ءتۇسىرۋ ءۇشىن ارنايى اققۋلار اكەلىندى.

17. قارشىعا مەن شەگەنىڭ كۇي جارىسىنەدا بيلەي جونەلەتىن اققۋلاردىڭ كورىنىسىن كەش باتىپ بارا جاتقاندا ءتۇسىرىپ ۇلگەرگەن. فيلمدەگى اققۋلار ءبيىن ءتۇسىرۋ ءۇشىن وپەراتور مەن رەجيسسەر ءبىر كۇن بويى تاپجىلماستان كۇتكەن.

18. كولەمى 3600 مەتر فيلم ءۇشىن 50 مىڭ مەتر پلەنكا ءتۇسىرىلدى. كەيبىر كادرلار 10-12 رەت قايتارا تۇسىرىلگەن.

19. قازاقتىڭ كەڭ ولكەسىنىڭ كوركەم بەينەسىن بارىنشا اسەم كورسەتۋ ماقساتىندا ۇلىتاۋ، اقتاۋ، التاي، جايىق، ىلە جاعاسى، قارقارالى، الاتاۋ تابيعاتى ءتۇسىرىلدى.

20. «قىز جىبەك» 1972 -جىلى باكۋدە بۇكىلوداقتىق كينوفەستيۆالدا كورسەتىلىپ، فيلم وڭ باعاعا يە بولدى.

ماقالا اۆتورى - ايا ءومىرتاي
el.kz