قازىرگى تاڭدا 20 مىڭنان اسا قانداسىمىز تۇركيادا ءومىر سۇرەدى

استانا.قازاقپارات -  انادولى ەلىنە ولاردىڭ العاشقى لەگى وتكەن عاسىردىڭ ورتاسىندا شىعىستىڭ التايىنان كوشىپ كەلگەن. «ەلۋ جىلدا ەل جاڭاردى» . ۇرپاقتىڭ ءۇش بۋىنى اتامەكەننەن جىراقتا ءوسىپ- ءوندى.

وسىعان وراي تۋىس ەلدە انا تىلمەن سالت- ءداستۇردى كوزدىڭ قاراشىعىنداي ساقتاۋ ءۇشىن قازاق مادەنيەتىن قولداۋ قورلارى اشىلىپ، وسكەلەڭ ۇرپاققا ۇلتتىق تاربيە بەرۋ باعىتىندا كەلەلى جۇمىستار جاساۋدا.

 دەگەنمەن الىستاعى اعايىن جاستاردىڭ جاڭا بۋىنىن ۇلتتىق سانادا تاربيەلەۋ ءۇشىن اتاجۇرتتان قولداۋ كۇتەتىندىكتەرىن قۇرىلتاي جيىنىندا اتاپ ءوتتى.

تالعات ماماشيەۆ، دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى:

- ءار ەلدىڭ ەكونوميكالىق ساياسي جاعدايىنا قاراي ءتۇرلى ماسەلەلەر تولعاندىرادى. سونىڭ ىشىندە ءتىل ماسەلەسى، ادەت عۇرپىمىز، سالت- ءداستۇرىمىز. جاستارىمىز اسسيميليتسياعا ۇشىراپ جاتقان ەلگە ءسىڭىپ كەتپەسە دەگەن ۇلكەن قورقىنىشى بار. امانشىلىق بولسا، سىرتتاعى قازاق دياسپوراسىنا دەگەن مەملەكەتتىك دەڭگەيدەگى كوزقاراستى وزگەرتەتىن ۋاقىت جەتتى دەپ مەن ەسەپتەيمىن.

دۇنيەجۇزى قازاقتارى قاۋىمداستىعى ەلباسىنىڭ جولداۋىن شەتەلدەگى قانداستارعا كەڭىنەن ناسيحاتتاۋدا. قاۋىمداستىق بۇگىنگى كۇنگە دەيىن رەسەي، وزبەكستان مەن ەۋروپا قازاقتارىنا جولداۋدا كوتەرىلگەن كەلەلى ماسەلەلەردى تانىستىرعان. ەندى مىنە تۇركياداعى اعايىن دا «ءبىر ماقسات، ءبىر مۇددە، ءبىر بولاشاق» توڭىرەگىنە ۇيىستى.

سەركان دينچتيۋرك، قازاق تۇرىكتەرى ءبىلىم جانە زەرتتەۋ قوعامى ءتوراعاسىنىڭ ورىنباسارى:

- ءبىز تۇركيادا وتىرمىز عوي، مەنىڭ ەۋروپادا وتىرعان ءۇش اعام دا بار. ەۋروپادا بولسىن، تۇركيادا بولسىن، جۇرگەندە ءبىزدى اتىمىزبەن ايتپايدى، قازاق دەپ ايتادى. جاقسى دا بولساق، جامان دا بولساق، قازاق دەپ اتايدى. سوندىقتان قازاقستاننىڭ كۇشتى بولۋى، ىلگەرى دامۋى - ءبىز ءۇشىن ۇلكەن قاۋانىش.

شەتەلدەگى قانداستارىمىزدى ازاماتتىق الۋ ءتارتىبىنىڭ جەڭىلدەتىلگەنى ەرەكشە قۋانتتى. «اتاجۇرت قۇشاق جايسا، كوش توقتامايدى، وسكەلەڭ ۇرپاق ەلگە قاراي بەت تۇزەيدى» ، - دەيدى ولار.

 «حابار»