ماسكەۋدە مەتروداعى اپاتتان 20 ادام قازا تاپتى
كەيىنىرەك ماسكەۋ دەنساۋلىق ساقتاۋ دەپارتامەنتى باستىعىنىڭ ورىنباسارى الەكسەي حريپۋن اپاتتان جارالانعان ءبىر ادامنىڭ اۋرۋحانادا كوز جۇمعانىن حابارلادى. وسىمەن اپاتتان قازا تاپقاندار سانى 20 ادامعا جەتتى.
الەكساندر گاۆريلوۆتىڭ سوزىنشە، قۇتقارۋشىلار جەتى جولاۋشىنىڭ سۇيەگىن عانا جەر بەتىنە شىعارعان، ءبىرىنشى جانە ەكىنشى ۆاگونداردا التى-التى ادامنىڭ دەنەسى جاتىر. پوەزد ءماشينيسى ءتىرى قالىپ، اۋرۋحاناعا تۇسكەن.
قۇتقارۋشىلار ءۇش ۆاگون رەلستەن شىعىپ كەتكەن ماڭدا، «پارك پوبەدى» جانە «سلاۆيانسكيي بۋلۆار» ستانسيالارى اراسىندا قالعان جولاۋشىلاردى قۇتقاردى.
ماسكەۋدەگى ت ج م وكىلى ۆيكتور بيريۋكوۆتىڭ سوزىنشە، مەترودا جالعان دابىل بەلگىسى قوسىلىپ كەتىپ سوستاۆ كىلت توقتاعان، سونىڭ كەسىرىنەن اپات بولعان. ول بولجامدى رەسەي تەرگەۋ كوميتەتى وكىلى ۆلاديمير ماركين دە قولدادى. بۇل وقيعاعا بايلانىستى كولىك قاۋىپسىزدىگىن ساقتاماۋى بابى بويىنشا قىلمىستىق ءىس قوزعالعان.
وقيعا بولعان جەرگە كەلگەن ماسكەۋ مەرى سەرگەي سوبيانين اپاتتا كوز جۇمعان ادامداردىڭ تۋىستارىنا 1 ميلليون رۋبل تولەنەتىنىن ايتتى.
قازاقستاننىڭ رەسەيدەگى ەلشىلىگى مەتروداعى اپاتتان زارداپ شەككەندەر اراسىندا قازاقستاندىقتار بار-جوعىن انىقتاپ جاتقانىن حابارلادى.
«ازاتتىق»