2050 -جىلعا قاراي جۇردەك پويىزدار ەۋروپانىڭ بارلىق استاناسىن بايلانىستىرۋى مۇمكىن
استانا. KAZINFORM - تاڭعى اس پاريجدە، تۇسكى اس فرانكفۋرتتا، كەشكى اس ۆەنادا - 2050 -جىلعا قاراي جۇردەك پويىزدار ەۋروپانىڭ بارلىق استاناسىن بايلانىستىرادى دەپ جوسپارلانىپ وتىر، دەپ حابارلايدى euronews.
تەمىرجول سالاسىنىڭ وكىلدەرى مەن ساياساتكەرلەر ءورشىل جوسپاردى بريۋسسەلدەن بەرلينگە دەيىنگى التى ساعاتتىق ساپار بارىسىندا تالقىلادى.
قازىرگى ۋاقىتتا ە و- داعى تەمىرجول جەلىلەرى قۇراق كورپە تارىزدەس. قاۋىمداستىق ەلدەرى جول ينفراقۇرىلىمىنا 15 تريلليون ەۋرو جۇمساسا، ال تەمىر جولدى دامىتۋعا شىعىنى ايتارلىقتاي از بولدى.
ساراپشىلاردىڭ پىكىرىنشە، جوعارى جىلدامدىقتى جەلى قۇرىلىسى ميلليونداعان جۇمىس ورنىن اشۋى مۇمكىن. سونىمەن قاتار تەمىرجول كولىگى ەكولوگيالىق جاعىنان الدەقايدا تازا.
«بىزگە تيىمدىرەك جەلى كەرەك. ەۋروپالىق كوميسسيانىڭ اۋە كولىگىمەن ءادىل باسەكەلەستىك بولۋى ءۇشىن تەمىر جول قۇرىلىسىن سۋبسيديالاۋعا رۇقسات بەرۋىن قالايمىز. ءبىز ەكى كولىك ءتۇرى اراسىندا نەعۇرلىم تەڭ ويىن الاڭىن جاساۋىمىز جانە ولاردىڭ ەڭ جاسىل ءتۇرى - پويىزعا قولداۋ كورسەتۋىمىز كەرەك»، - دەدى بەلگيانىڭ كولىك ءمينيسترى جورج جيلكينە.
ازىرگە ەۋروپالىقتار تەمىرجولدان گورى اۋە كولىگىمەن ساپارلاۋدى ارتىق كورەدى. وعان ۇشاق بيلەتتەرىنىڭ ارزان بولۋى دا سەبەپ. ءبىراق تاعى ءبىر ماسەلە بار.
«ءتۇرلى ساياسي سەبەپتەرگە بايلانىستى شەكارانى پويىزبەن كەسىپ ءوتۋ قيىن، ويتكەنى بۇل حالىقارالىق باعىتتار بويىنشا ۇلتتىق ۇكىمەتتەردىڭ دە، ۇلتتىق تەمىرجول كومپانيالارىنىڭ دا باسىمدىعى ەمەس. سوندىقتان مەن ە و- نىڭ قانداي دا ءبىر ساياسي شارا قولدانعانىن قالايمىن. ە و- عا ول شەشۋى ءتيىس ماسەلەلەر بار ەكەنىن ايتقىم كەلەدى»، - دەدى تەمىرجول كولىگىنىڭ تاۋەلسىز ساراپشىسى دجون ۋورت.