ح و ك 6-قازان كۇنى ۇمىتكەرلەر ءتىزىمىن جانە الەۋەتتى ۇيىمداستىرۋشىلارعا ارنالعان نۇسقاۋلىقتاردى جاريالادى.
باسقا ەلدەردىڭ ۇلتتىق وليمپيادا كوميتەتتەرى دە قىزىعۋشىلىق تانىتىپ جاتسا، 2026-جىلدىڭ 31-قازانىنا دەيىن ح و ك- تىڭ ەسىگى اشىق.
قاراشا ايىندا ۇمىتكەر ەلدەر ءوز جوبالارىن ح و ك كوميسسياسىنا ۇسىنادى.
2027-جىلدىڭ ناۋرىز ايىندا اتقارۋشى كوميتەت قىسقا ءتىزىمدى بەكىتىپ، ستراتەگيالىق ديالوگ كەزەڭىن باستايدى.
ءتىزىمنىڭ ىشىنەن باسىمدىق بەرىلەتىن ۇمىتكەرلەر 2028-جىلدىڭ سوڭىنا دەيىن ىرىكتەلىپ، سوڭعى شەشىمدى ح و ك مۇشەلەرى 2029-جىلدىڭ ورتاسىندا داۋىس بەرۋ ارقىلى قابىلدايدى.
ىرىكتەۋ قاعيداتتارىن اتقارۋشى كەڭەس ماقۇلداپ، «Fit for the Future» رەفورماسى اياسىندا 2026-جىلدىڭ ماۋسىم ايىندا لوزاننادا وتكەن ح و ك- تىڭ 146-سەسسياسىندا بەكىتىلدى.
جوبالار ارەنالاردىڭ باس جوسپارى مەن سپورتشىلارعا جاسالاتىن جاعدايلارعا، قارجىلاندىرۋ كوزدەرىنە، ساياسي جانە قوعامدىق قولداۋعا، ويىندارعا دايىندىق جانە مۇرا ستراتەگياسىنا نەگىزدەلىپ باعالانادى.
ءۇندىستان احمەدابادتى ۇسىنادى. ءۇندى ەلى وليمپياداعا العاش رەت ءوتىنىم بەرىپ وتىر. قاتار دوحادا وتكىزگىسى كەلەدى. ەل استاناسى فۋتبولدان 2022-جىلعى الەم چەمپيوناتىن وتكىزىپ، تاجىريبە جيناقتاعان، ءبىراق جازدىڭ اپتاپ ىستىعىنا بايلانىستى ادەتتەگىدەي شىلدە جانە تامىزدا ەمەس، سالقىن ايلاردا وتكىزۋگە تۋرا كەلۋى مۇمكىن.
گەرمانيانىڭ نامىسىن 1972-جىلعى ويىنداردىڭ قوجايىنى ميۋنحەن قورعاماق. وڭتۇستىك كورەيا 1988-جىلعى جازعى ويىنداردى وتكىزگەن سەۋلدى ۇسىنىپ وتىر.
وڭتۇستىك افريكا كەيپتاۋنعا ارقا سۇيەپ، وليمپيادا ويىندارىن وتكىزگەن العاشقى افريكالىق ەل بولعىسى كەلەدى.
ۆەنگريا بۋداپەشتى، ال تۇركيا بۇرىن دا بىرنەشە رەت ءوتىنىم بەرگەن ستامبۇلدى ۇسىنىپ وتىر.
كەيبىر ۇلتتىق كوميتەتتەر ح و ك- پەن 2036-جىلدان كەيىن، سونىڭ ىشىندە 2040 جانە 2044-جىلدارى ويىنداردى وتكىزۋ مۇمكىندىگى جونىندە كەلىسسوز جۇرگىزىپ جاتىر.
قازىرگى ۋاقىتتا الداعى ءتورت وليمپيادانىڭ قوجايىنى بەلگىلى: 2028-جىلى لوس-اندجەلەس، 2030-جىلى فرانسيانىڭ ءالپى تاۋلارىنداعى قالالارى، 2032-جىلى اۋستراليانىڭ بريسبەن قالاسى، ال 2034-جىلى ا ق ش- تىڭ يۋتا شتاتى قابىلدايدى.
- ويىندار قاي جەردە وتسە دە، ءبىر نارسە وزگەرمەۋى كەرەك: ءبىزدىڭ بارلىق جۇمىسىمىزدىڭ قاق ورتاسىندا سپورتشىلار بولسىن، - دەدى ح و ك پرەزيدەنتى كيرستي كوۆەنتري.
بۇعان دەيىن بەرلين 2036-جىلعى وليمپيادانى وتكىزۋگە ۇمىتكەر بولۋدان باس تارتاتىنىن، سونداي-اق ميۋنحەن گەرمانيانىڭ جازعى وليمپيادا ويىندارىن وتكىزۋگە ۇمىتكەرى اتانعانىن حابارلاعان ەدىك.