ەلىمىزدە بازالىق زەينەتاقى 2027 -جىلعا قاراي 120 پايىز ارتادى

استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگى بازالىق زەينەتاقىنى تاعايىنداۋ پروتسەسىنە تۇسىنىكتەمە بەردى، دەپ حابارلايدى قازاقپارات ءتىلشىسى.

«بيىل 1-قاڭتاردان باستاپ قازاقستاندا زەينەتاقىنىڭ ەڭ تومەنگى مولشەرى - 24341 تەڭگە، ىنتىماقتى زەينەتاقىنىڭ ەڭ تومەن مولشەرى - 53076 تەڭگە. جاسى كەلىپ زەينەتكە شىققاندا زەينەتاقى ورتاشا ايلىق كىرىستى نەگىزگە الا وتىرىپ تاعايىندالادى. تاعى ءبىر جايت، زەينەتاقىنى تاعايىنداۋدا رەسپۋبليكالىق بيۋدجەت تۋرالى زاڭدا بەلگىلەنگەن ايلىق ەسەپتىك كورسەتكىشتىڭ 55 (189750 ت گ) مولشەرىنەن اسپاۋعا ءتيىس. جاسى كەلىپ زەينەتكە شىققاندا زەينەتاقى تولىق كولەمدە كەلەسى ساناتتاعى ادامدارعا بەرىلەدى. ەرلەرگە - 1998 -جىلعى 1- قاڭتاردا كەمىندە جيىرما بەس جىل ەڭبەك ءوتىلى بولعان كەزدە، ايەلدەرگە - 1998 -جىلعى 1- قاڭتاردا كەمىندە جيىرما جىل ەڭبەك ءوتىلى بولسا»، - دەگەن جاۋاپ كەلدى قازاقپارات جولداعان ساۋالعا.

مينيسترلىك ۇسىنعان اقپاراتتا ايتىلعانداي، تالاپ ەتىلەتىن ەڭبەك وتىلىنەن ارتىق 1998 -جىلعى 1-قاڭتارعا دەيىن جۇمىس ىستەگەن ءاربىر تولىق جىل ءۇشىن جاسىنا بايلانىستى زەينەتاقى تولەمدەرىنىڭ مولشەرى 1 پايىزعا ۇلعايتىلادى. ءبىراق بۇل جاسىنا بايلانىستى زەينەتاقى تولەمدەرىن ەسەپتەۋ ءۇشىن ەسەپكە الىناتىن كىرىستىڭ 75 پايىزىنان (142313 ت گ) اسپايتىن مولشەردە.

«قازىر بازالىق زەينەتاقى جۇيەسىنە قاتىسۋ ءوتىلى 30 جىل نەمەسە ودان جوعارى بولعان جاعدايدا رەسپۋبليكالىق بيۋدجەت تۋرالى زاڭدا بەلگىلەنگەن ەڭ تومەن كۇنكورىس دەڭگەيىنىڭ 100 پايىزى (2023 -جىلى - 40567 ت گ) مولشەرىندە تاعايىندالادى. بۇل كورسەتكىش 5 جىل ارالىعىندا (2027 -جىلعا دەيىن) كەزەڭ- كەزەڭىمەن % 120 - عا دەيىن ارتادى»، - دەپ تولىقتىردى ۆەدومستۆودان.

اۆتور:

داۋلەت ىزتىلەۋ