ەلدى دامىتۋدىڭ 2025-جىلعا دەيىنگى ۇلتتىق جوسپارى جاسالادى
بۇل جونىندە اقوردادا مەملەكەت باسشىسى قاسىم- جومارت توقايەۆتىڭ توراعالىعىمەن رەفورمالار جونىندەگى جوعارعى كەڭەستىڭ ءۇشىنشى وتىرىسىندا ايتىلدى، دەپ حابارلايدى قازاقپارات ءتىلشىسى.
جاڭارتىلعان مەملەكەتتىك جوسپارلاۋ جۇيەسى باعدارلامالىق قۇجاتتاردىڭ نەعۇرلىم يكەمدى ارحيتەكتۋراسىن قۇرىپ، ستراتەگيالىق جانە بيۋدجەتتىك جوسپارلاۋدىڭ ءوزارا بايلانىسىن ارتتىرىپ، مەملەكەتتىك ورگاندار مەن ۇيىمدار باسشىلارىنىڭ تىكەلەي جاۋاپكەرشىلىگىن ناقتى بەكىتۋگە ءتيىس. اقوردادا وتكەن جيىندا الەمدەگى جەتەكشى مەملەكەتتەردىڭ بىرىنە اينالۋ ءۇشىن ەلدى ودان ارى دامىتۋدىڭ ءۇش نەگىزگى باعىتىن انىقتاۋ ۇسىنىلدى.
ولار: ينستيتۋتتاردىڭ ساپاسى، ازاماتتاردىڭ ءال- اۋقاتى جانە قۋاتتى ەكونوميكا. بۇل رەتتە ورتا مەرزىمدى كەزەڭگە ارنالعان مىندەتتەردى ايقىندايتىن نەگىزگى قۇجات - ەلدى دامىتۋدىڭ 2025 -جىلعا دەيىنگى ۇلتتىق جوسپارى بولادى. وندا ماڭىزدى سالالاردى دامىتۋداعى كوزقاراس، نەگىزگى ساياساتتى جەتىلدىرۋ جونىندەگى باعىتتار كورسەتىلەدى. ۇلتتىق جوبالار قىزمەتتەگى جانە سالاداعى بەلگىلى ءبىر باعىتتاردىڭ نەگىزگى ماسەلەلەرىن شەشۋگە باعىتتالادى. ولار بارىنشا سالالىق بولۋعا ءتيىس.
بەلگىلى ءبىر مەرزىمدە ناقتى ناتيجە الۋعا باعىتتالىپ، تولىعىمەن قارجىلاندىرىلۋى كەرەك. قازىرگى ۋاقىتتا سيفرلاندىرۋ، اگروونەركاسىپتىك كەشەندى دامىتۋ، كاسىپكەرلىك، باسەكەلەستىك، قورشاعان ورتانى قورعاۋ جانە باسقا دا باعىتتاعى جوبالاردى ازىرلەۋ جۇمىستارى جۇرگىزىلۋدە. بۇل قۇجاتتار وسى جىلدىڭ 1-شىلدەسىنەن كەشىكتىرىلمەي ازىرلەنىپ، بەكىتىلۋى كەرەك.
قاسىم- جومارت توقايەۆ سالالىق ماسەلەلەردى تالقىلاۋعا بىلىكتى ساراپشىلاردىڭ بەلسەندى قاتىسۋىن قامتاماسىز ەتۋدى تاپسىردى. ال ەگەر اسا ماڭىزدى قوعامدىق مۇددەلەر قوزعالار بولسا، وندا ازاماتتاردى بۇل ماسەلەگە بارىنشا تارتۋدى جۇكتەدى.