اسقار مامين: 2025-جىلعا قاراي حالىقتىڭ ساپالى اۋىز سۋعا قول جەتكىزۋ ماسەلەسى شەشىلەدى
بۇل تۋرالى ۇكىمەت وتىرىسىندا پرەمەر-مينيستر اسقار مامين ايتتى، دەپ حابارلايدى قازاقپارات ءتىلشىسى.
«سۋمەن جابدىقتاۋ جانە سۋ بۇرۋ ماسەلەلەرى ۇكىمەتتىڭ ستراتەگيالىق مىندەتى بولىپ تابىلادى جانە حالىقتىڭ ءومىر ءسۇرۋ ساپاسىن جاقسارتۋعا تىكەلەي اسەر ەتەدى. جالپى ەلدە ورتالىقتاندىرىلعان سۋمەن جابدىقتاۋ قالالاردا 97,2, اۋىلداردا 86,4 پايىزدى قۇرايدى. «نۇرلى جەر» مەملەكەتتىك باعدارلاماسى بويىنشا 2025-جىلعا قاراي حالىقتىڭ 100 پايىز سۋمەن جابدىقتاۋ قىزمەتىمەن قامتاماسىز ەتىلەدى. وسىنىڭ ارقاسىندا ءبىز حالىقتىڭ ساپالى اۋىز سۋعا قول جەتكىزۋ ماسەلەسىن تولىعىمەن شەشەمىز»، - دەدى اسقار مامين.
ونىڭ اتاپ وتۋىنشە، سۋمەن جابدىقتاۋ ماسەلەسىنىڭ الەۋمەتتىك ماڭىزدىلىعىن ەسكەرە وتىرىپ، ءار اكىمدىكتىڭ ەلدى مەكەندەرگە، اسىرەسە، تۇرعىندارى از اۋىلدارعا ءتيىستى ينفراقۇرىلىمدى جەتكىزۋ بويىنشا ناقتى جوسپارلارى بولۋ كەرەك.
«وسى ماسەلەدەگى ماڭىزدى فاكتور توپتىق سۋ قۇبىرلارىنىڭ ينفراقۇرىلىمىن جاساۋ جانە اۋىلداردىڭ شەكاراسىنا دەيىن جەتكىزۋ كەرەك. بۇل جۇمىس جەلىلەردى ەلدى مەكەندەردىڭ ىشىندە تارتۋمەن ۇيلەسىمدى ءجۇرۋى قاجەت. جاۋاپتى مينيسترلىكتەر مەن اكىمدىكتەر، ءبىرىنشى كەزەكتە، ارتتا قالعان وڭىرلەر وسى ماسەلەنى ەرەكشە باقىلاۋدا ۇستاسىن»، - دەدى ۇكىمەت باسشىسى.