2025 -جىلى جاردەماقىلار مەن زەينەتاقى نەشە پايىزعا وسەدى

استانا. KAZINFORM – ق ر ەڭبەك جانە حالىقتى الەۋمەتتىك قورعاۋ مينيسترلىگى كەلەر جىلى ەلىمىزدە جاردەماقى مەن تولەمدەردىڭ وسىمىنە قاتىستى تۇسىنىك بەردى.

قازاقستان رەسپۋبليكاسىنىڭ الەۋمەتتىك كودەكسىنە سايكەس، رەسپۋبليكالىق بيۋدجەت ەسەبىنەن كەلەسى جاردەماقىلار مەن تولەمدەر قامتىلعان:

- بالا تۋۋىنا بايلانىستى ءبىرجولعى مەملەكەتتىك جاردەماقى؛

- بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى اي سايىنعى مەملەكەتتىك جاردەماقى؛

- بىرگە تۇراتىن ءتورت جانە ودان كوپ كامەلەتكە تولماعان بالاسى، ونىڭ ىشىندە 18 جاسقا تولعاننان كەيىن ءبىلىم بەرۋ ۇيىمدارىن بىتىرەتىن ۋاقىتقا دەيىن (ءبىراق جيىرما ءۇش جاسقا تولعانعا دەيىن) جالپى ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى نەمەسە جوعارى وقۋ ورنىنان كەيىنگى ءبىلىم بەرۋ ۇيىمدارىندا جالپى ءبىلىم بەرەتىن، سونداي- اق كاسىپتىك باعدارلامالار بويىنشا كۇندىزگى وقۋ نىسانى بويىنشا ءبىلىم الاتىن بالالارى بار كوپبالالى وتباسىلارعا بەرىلەتىن اي سايىنعى مەملەكەتتىك جاردەماقى؛

- «التىن القا»، «كۇمىس القا» العان نەمەسە بۇرىن «باتىر انا» اتاعىن العان، I جانە Ⅱ دارەجەلى «انا داڭقى» وردەندەرىمەن ماراپاتتالعان كوپبالالى انالارعا بەرىلەتىن اي سايىنعى مەملەكەتتىك جاردەماقى؛

- مۇگەدەكتىگى بار بالانى تاربيەلەپ وتىرعان اناعا نەمەسە اكەگە، بالا اسىراپ الۋشىعا، قامقورشىعا تاعايىندالاتىن جانە تولەنەتىن مەملەكەتتىك جاردەماقى؛

- ازاماتتاردىڭ جەكەلەگەن ساناتتارىنا تاعايىندالاتىن ارناۋلى مەملەكەتتىك جاردەماقى؛

- اسىراۋشىسىنان ايىرىلۋ جاعداي بويىنشا جانە مۇگەدەكتىگى بار ادامدارعا مەملەكەتتىك جاردەماقى؛

- جەراستى جانە اشىق كەن جۇمىستارىندا، ەڭبەك جاعدايلارى ەرەكشە زياندى جانە ەرەكشە اۋىر جۇمىستاردا نەمەسە ەڭبەك جاعدايلارى زياندى ءارى اۋىر جۇمىستاردا ىستەگەن ادامدارعا بەرىلەتىن مەملەكەتتىك ارنايى جاردەماقى.

«جوعارىدا اتالعان جاردەماقىلار مەن تولەمدەردىڭ مولشەرى ەڭ تومەنگى كۇنكورىس دەڭگەيىنىڭ شاماسىنا جانە ايلىق ەسەپتىك كورسەتكىشكە بايلانىستى بەلگىلەنەدى. 2025 -جىلدىڭ باسىنان اتالعان جاردەماقىلاردىڭ مولشەرى 6,5 پايىزعا ارتادى. ق ر پرەزيدەنتىنىڭ 2014 -جىلعى 18-ماۋسىمداعى № 841 جارلىعىمەن بەكىتىلگەن قازاقستان رەسپۋبليكاسىنىڭ زەينەتاقى جۇيەسىن 2030 -جىلعا دەيىن ودان ءارى جاڭعىرتۋ تۇجىرىمداماسىنا سايكەس، ىنتىماقتى زەينەتاقى مولشەرىن قولايلى دەڭگەيدە ۇستاپ تۇرۋ ءۇشىن ولاردىڭ مولشەرى جىل سايىن ينفلياتسيا دەڭگەيىنەن ەكى پايىزعا وزىپ يندەكستەلەدى. «2025-2027 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا سايكەس، جاسىنا جانە ەڭبەك سىڭىرگەن جىلدارىنا بايلانىستى زەينەتاقى تولەمدەرىنىڭ مولشەرىن 2025 -جىلعى 1-قاڭتاردان باستاپ الىناتىن مولشەردەن %8,5 عا ارتتىرۋ جوسپارلانىپ وتىر، بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ وزگەرۋىنە بايلانىستى وسەتىن بولادى. ءبىرىڭعاي جيناقتاۋشى زەينەتاقى قورىنان تولەنەتىن زەينەتاقى تولەمدەرى جىل سايىن %5 عا يندەكستەلەدى»، - دەلىنگەن ەڭبەك مينيسترلىگىنىڭ Kazinform اگەنتتىگىنە بەرگەن جاۋابىندا.

سونىمەن قاتار، «مەملەكەتتىك الەۋمەتتىك ساقتاندىرۋ قورى» ا ق-دان تولەنەتىن ەڭبەككە قابىلەتتىلىكتەن ايىرىلۋ جانە اسىراۋشىسىنان ايىرىلۋ جاعدايلارى بويىنشا تولەنەتىن الەۋمەتتىك تولەمدەردىڭ مولشەرى 2025 -جىلعى 1-قاڭتاردان باستاپ %6,5 عا ارتادى.

وسىعان دەيىن ب ا ق وكىلدەرىمەن كەزدەسكەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەل ازاماتتارىنىڭ زەينەتكەرلىككە ەرتە شىعۋ مۇمكىندىگىنە قاتىستى پىكىر ءبىلدىردى.