2025 -جىلداعى بيۋدجەت تاپشىلىعى بەلگىلى بولدى

استانا. KAZINFORM - پارلامەنت ءماجىلىسىنىڭ قاراۋىنا «ق ر ۇلتتىق قورىنان 2025 - 2027 -جىلدارعا ارنالعان كەپىلدەندىرىلگەن ترانسفەرت تۋرالى» جانە «2025 - 2027 -جىلدارعا ارنالعان رەسپۋبليكالىق بيۋدجەت تۋرالى» زاڭ جوبالارى كەلىپ ءتۇستى.

«اتالعان زاڭ جوبالارى قازاقستان رەسپۋبليكاسىنىڭ بيۋدجەت كودەكسىنە سايكەس ازىرلەندى جانە ۇكىمەتتىڭ قاۋلىلارىمەن 2024 -جىلعى 28-تامىزدا ءماجىلىستىڭ قاراۋىنا ەنگىزىلدى. ۇلتتىق قوردان 2025-2027 -جىلدارعا ارنالعان رەسپۋبليكالىق بيۋدجەتكە كەپىلدەندىرىلگەن ترانسفەرتتىڭ جىلدىق كولەمى 2 تريلليون تەڭگەنى قۇرادى. كەپىلدەندىرىلگەن ترانسفەرتتىڭ مولشەرى مۇناي سەكتورى ۇيىمدارىنان ۇلتتىق قورعا تۇسەتىن تۇسىمدەردىڭ بولجامدى كولەمىنەن اسپايدى»، - دەدى ءماجىلىستىڭ قارجى جانە بيۋدجەت كوميتەتىنىڭ ءتوراعاسى تاتيانا ساۆەليەۆا پالاتانىڭ جالپى وتىرىسىندا.

ونىڭ ايتۋىنشا، 2025-2027 -جىلدارعا ارنالعان رەسپۋبليكالىق بيۋدجەت جوباسى قازاقستان رەسپۋبليكاسىنىڭ الەۋمەتتىك- ەكونوميكالىق دامۋىنىڭ بولجامى، 2025-2027 -جىلدارعا ارنالعان بيۋدجەت پارامەترلەرى، سونداي-اق ق ر پرەزيدەنتىنىڭ تاپسىرمالارى نەگىزىندە ازىرلەندى. 2025 -جىلى رەسپۋبليكالىق بيۋدجەت كىرىستەرىنىڭ كولەمى 21,7 تريلليون تەڭگە، ونىڭ ىشىندە تابىس -15,6 تريلليون تەڭگە، ۇلتتىق قوردان تۇسكەن ترانسفەرتتەر 5,3 تريلليون بولادى (كەپىلدەندىرىلگەن ترانسفەرت - 2 تريلليون تەڭگە جانە نىسانالى ترانسفەرت - 3,3 تريلليون تەڭگە).

«شىعىستاردىڭ جالپى سوماسى 25,8 تريلليون تەڭگە سوماسىندا جوسپارلانعان. بۇل رەتتە، 2025 -جىلى بيۋدجەت تاپشىلىعى 4,1 ميلليون  تەڭگە دەڭگەيىندە ايقىندالدى. اتاپ ايتقاندا، ءماجىلىس كوميتەتى اتالعان زاڭ جوبالارىن تالقىلاۋعا الۋعا جانە ولار بويىنشا قورىتىندى ازىرلەۋگە دايىن»، - دەدى ت. ساۆەليەۆا.