مينيسترلىكتىڭ باسپا ءسوز قىزمەتىنەن ءمالىم ەتكەندەي، جۇزدەسۋدە رەزيدەنتۋرا مەن ينتەرناتۋرانىڭ 30 دان استام تۇلەگى ءوز جۇمىسى جايلى بايانداپ، ۆەدومستۆو باسشىسىنا جەكە سۇراقتارىن قويدى.
سونداي- اق «ديپلوممەن اۋىلعا» باعدارلاماسىنا ۇقساس جوبا ارقىلى قالالارداعى جاس مامانداردى دا تۇرعىن ۇيمەن قامتۋ جايى ءسوز بولدى. ەلجان ءبىرتانوۆ بۇل ماسەلە شەشىلىپ جاتقانىن ايتىپ ءوتتى.
«بايتەرەك» قورىمەن بىرلەسىپ جاس ماماندار ءۇشىن جالعا بەرىلەتىن تۇرعىن ءۇي باعدارلاماسىن ىسكە قوسۋدى جوسپارلاپ وتىرمىز»، - دەدى مينيستر.
«وبلىس اكىمدىگى قازاقستاندىق يپوتەكالىق كومپانيامەن مەموراندۋمعا قول قويدى جانە وسى كەلىسىم اياسىندا جاس دارىگەرلەرگە 200-گە جۋىق پاتەر ءبولۋدى كوزدەپ وتىر»، - دەدى وبلىستىق دەنساۋلىق ساقتاۋ باسقارماسىنىڭ باسشىسى ەرجان نۇرلىبايەۆ.
كەزدەسۋ بارىسىندا «پاتولوگواناتوميا» ماماندىعى بويىنشا رەزيدەنتۋراعا ءتۇسۋ ماسەلەسى دە كوتەرىلدى. ەلجان ءبىرتانوۆ جوعارى وقۋ ورنىنىڭ تۇلەكتەرىنە وبلىسقا وسى ماماندىق تىڭ اسا قاجەت ەكەنىن ءتۇسىندىرىپ، مەملەكەت ەسەبىنەن قايتا دايارلاۋدان ءوتۋدى ۇسىندى. سونداي- اق، بۇل ماسەلەنى جەكە باقىلاۋعا الدى.
ەلجان ءبىرتانوۆ جاڭادان وقۋدى اياقتاعان جاس ارىپتەستەرىن قۇتتىقتاپ، ەلىمىزدە كاسىبي دارىگەرلەردىڭ قاتارى كوبەيگەنىن ايتتى.
«دارىگەر ماماندىعىن تاڭداعاندارىڭىز ءۇشىن العىس ايتامىن. ءبىز GPA كوتەردىك، باعدارلامانى كۇردەلەندىردىك. سوندىقتان، جۇزدەن جۇيرىك، ۇزدىكتىڭ ۇزدىگى عانا سۇرىنبەي، سوڭىنا دەيىن وقىدى. مەنىڭشە، دارىگەر بولۋدىڭ ارتىقشىلىعى كوپ. مۇنى ۇمىتپاڭىزدار»، - دەدى ول تۇلەكتەرگە.
«ادام مەديتسينالىق ينستيتۋتقا بولاشاقتا جايلى جانە باي- قۋاتتى ءومىر ءسۇرۋ ءۇشىن ەمەس، ماماندىقتىڭ وزىنە قىزىعىپ بارادى. تاڭداۋلارىڭىزعا قاشان دا ادال بولىڭىزدار. مەديتسينا وڭاي كاسىپ ەمەس، ول ۇنەمى قارقىندى دامۋ ۇستىندە»، - دەدى مينيستر.
ۆەدومستۆو باسشىسى دەنساۋلىق ساقتاۋ جۇيەسىندە جۇمىس جاساۋ جاعدايلارى جاقسارتىلا بەرەتىنىن، ال جالاقى جىل سايىن كوتەرىلىپ وتىراتىنىن ايتتى. ونىڭ ايتۋىنشا، 2025 -جىلعا قاراي دارىگەردىڭ تابىسى 500-600 مىڭ تەڭگەدەن اسادى. سونىمەن قاتار، كەلەسى جىلى مىندەتتى الەۋمەتتىك مەديتسينالىق ساقتاندىرۋ ەنگىزىلگەن سوڭ، جالاقى تاعى كوتەرىلەدى.