تۇركىستاندا 2025-جىلعا دەيىن 26,5 مىڭ پاتەر سالىنادى - ايدوس ۇكىباي
«ەلباسىنىڭ بۇل جوباسى، ءوزى اتاپ وتكەندەي، تاۋەلسىزدىگىمىزدىڭ باستاپقى كەزەڭىندە-اق جوسپارلانعان بولاتىن. نۇرسۇلتان نازاربايەۆ ەلوردانىڭ 20 جىلدىعىن وتكەرىپ، قازاقستاننىڭ رۋحاني استاناسىن جاڭعىرتۋعا كىرىسۋ تۋرالى كەزەكتى ستراتەگيالىق تۇرعىدان دۇرىس شەشىم قابىلداعان بولاتىن. سول ءۇشىن 2018-جىلى تۇركىستان وبلىسىن قۇرۋ جانە وبلىس ورتالىعىن تۇركىستانعا كوشىرۋ تۋرالى تاريحي جارلىققا قول قويىلعان كۇنى قازاقستاننىڭ تۇڭعىش پرەزيدەنتى كەڭەس وتكىزىپ، وندا ۇلتتىق كومپانيا باسشىلارى مەن ءىرى بيزنەس وكىلدەرىن قالانىڭ قۇرىلىسىنا بەلسەندى قاتىسۋعا شاقىردى»، - دەپ ەسكە الادى ەلباسىنىڭ باسپا ءسوز حاتشىسى.
ايدوس ۇكىباي بۇل جوباعا دا اۋەل باستا كۇدىكپەن قارايتىندار بولعانىن ايتادى.
«ارينە، ەلباسى يدەياسىنا كۇمانمەن قارايتىندار دا بولدى. ءبىراق، 1994-جىلى دا ساياساتكەرلەردىڭ كوپشىلىگى قازاقستاننىڭ استاناسىن كوشىرۋ جانە جاڭاسىن تۇرعىزۋ يدەياسىنا كۇمانمەن قاراعانى ەسىمىزدە. الايدا سكەپتيكتەر مىنا ءبىر ماڭىزدى فاكتوردى ەسكەرمەگەن ەدى: نۇرسۇلتان نازاربايەۆ باستالعان ءىستى ءاردايىم اياعىنا دەيىن جەتكىزەدى»، - دەيدى تۇڭعىش پرەزيدەنتتىڭ باسپا ءسوز حاتشىسى.
ول، سونداي-اق، ءۇش جىلدىڭ ىشىندە تۇركىستاننىڭ قارقىندى دامىعانىن كورىپ ينۆەستورلار مەن وتاندىق بيزنەسمەندەر تاراپىنان قالا اۋماعىندا ءتۇرلى جوبالاردى ىسكە اسىرۋ تۋرالى ۇسىنىستار مولىنان ءتۇسىپ جاتقانىن جەتكىزەدى.
جەرگىلىكتى كاسىپكەرلەردىڭ ءوز بيزنەستەرىن كەڭەيتۋ ءۇشىن كوبىرەك جەر سۇراپ جاتۋى ءوڭىردىڭ جارقىن بولاشاعىنان حابار بەرەتىن بەلگى ەكەنىن ايتادى.
«نۇرسۇلتان ءابىش ۇلى تۇركىستاننىڭ جاڭعىرۋى - تەك اسەم دە ايبىندى نىساندار عانا ەمەس، ەڭ الدىمەن، ءوڭىر تۇرعىندارىنىڭ جانە بارشا قازاقستاندىقتاردىڭ ءال-اۋقاتىن ارتتىرۋ ەكەنىن ۇنەمى اتاپ ءوتتى.
سوندىقتان ەكىنشى كەزەڭدە وڭىردە دەنساۋلىق ساقتاۋ، ءبىلىم بەرۋ، ەنەرگەتيكا، ونەركاسىپ جانە ينفراقۇرىلىمدىق دامۋ سالاسىنداعى جوبالار (ءوڭىردى دامىتۋ جوسپارىنىڭ 140 تان استام ءىس-شاراسى) ىسكە اسىرىلاتىن بولادى. كەشەندى دامۋدىڭ ەكىنشى كەزەڭىن ىسكە اسىرۋ شەڭبەرىندە جىل سايىن 40 مىڭ جۇمىس ورنى قۇرىلاتىن بولادى. 2025-جىلعا دەيىن 1,4 ميلليون شارشى مەتر تۇرعىن ءۇي نەمەسە 26,5 مىڭ پاتەر سالۋ جانە پايدالانۋعا بەرۋ جوسپارلانۋدا»، - دەدى ول.
تۇڭعىش پرەزيدەنتتىڭ باسپا ءسوز حاتشىسى اتالعان ناتيجەلەرگە ەلباسىنىڭ ساياسي ەرىك-جىگەرىنىڭ، قاجىرلى ەڭبەگىنىڭ جانە جەكە قاتىسۋىنىڭ ارقاسىندا قول جەتكىزىلگەنىن، مەملەكەت باسشىسى قاسىم-جومارت توقايەۆ تا تۇركىستاننىڭ قايتا تۇرلەنۋىنە ەرەكشە ءمان بەرىپ وتىرعانىن اتاپ وتەدى.
«قالا مەن ايماقتى دامىتۋدا جەرگىلىكتى اكىمدىك پەن ۇكىمەتكە ۇلكەن جاۋاپكەرشىلىك جۇكتەلگەن. ولار تۇڭعىش پرەزيدەنت بەكىتكەن تۇجىرىمداما مەن جوسپارلاردى ناقتى جانە ۋاقتىلى جۇزەگە اسىرىپ وتىر. پرەمەر-مينيستر باستاعان ۇكىمەتتىڭ ۇيلەسىمدى كوماندالىق جۇمىسى پاندەميا جاعدايىندا دا بارلىق قاۋىپسىزدىك شارالارىن ەسكەرە وتىرىپ، ماڭىزدى الەۋمەتتىك-مادەني نىسانداردىڭ قۇرىلىسىن جالعاستىرۋعا مۇمكىندىك بەردى. تۇركىستان مەن تۇركىستان وبلىسى ءاربىر كەزەكتى ساپارمەن ءبىزدى جاڭا جەتىستىكتەرمەن تاڭعالدىراتىنىنا سەنىمدىمىن»، - دەگەن ا. ۇكىباي وي-تولعامىن نۇرسۇلتان نازاربايەۆتىڭ سوزىمەن تۇيىندەدى:
«بۇگىن ءبىز بۇرىن ءتىپتى ارمانداي الماعان ءىستى جۇزەگە اسىرىپ جاتىرمىز. بۇعان قۋانۋىمىز كەرەك. بۇل جەتىستىگىمىزدى تاۋەلسىزدىكتىڭ 30 جىلدىعىنا ارنايمىز. ءبىز تاۋەلسىز قازاقستاندى دامىتىپ، اتا-بابالارىمىزدىڭ ارمانىن جۇزەگە اسىرىپ وتىرمىز. بىرلىگىمىز الداعى ۋاقىتتا دا نىعايا بەرسىن. تەك جۇدىرىقتاي جۇمىلۋ ارقىلى عانا جولىمىزداعى قيىندىقتاردىڭ ءبارىن جەڭەمىز».