«بيىل ءبىزدىڭ ەلدە جوندەۋ جۇمىستارىمەن 4 مىڭ شاقىرىم جول قامتىلدى. جالپى «نۇرلى جول 1» جانە «نۇرلى جول 2» باعدارلاماسى بويىنشا جوسپاردى ورىنداپ كەلەمىز. ياعني 2015-2020 -جىل ارالىعىندا «نۇرلى جول 1» باعدارلاماسى بويىنشا جۇمىستى اياقتاپ، 13 مىڭ شاقىرىم جولدى قايتا جوندەۋدەن وتكىزدىك. 8 مىڭ شاقىرىم جولدى 1 جانە Ⅱ ساناتتى جولداردىڭ قاتارىنا ەنگىزدىك. بيىلدان باستاپ «نۇرلى جول 2» باعدارلاماسى باستالدى. بۇل جولى 2020-2025 -جىلعا دەيىنگى ارالىقتا جول جوندەۋ جۇمىستارى باستالادى. وعان سايكەس جالپى 24 مىڭ شاقىرىم جولدى «جاقسى» جانە «قاناعاتتانارلىق» جاعدايعا جەتكىزۋدى كوزدەيمىز. ونىڭ ىشىندە جولدىڭ 60 پايىزى 1 جانە Ⅱ ساناتقا ەنگىزىلەدى»، - دەدى ۇلان ءالىپوۆ «QazAvtoJol» ۇلتتىق كومپانياسىنىڭ تىكەلەي ەفيرىندە سويلەگەن سوزىندە.
كومپانيا باسشىسىنىڭ ايتۋىنشا الداعى بەس جىلدىڭ ىشىندە 11 مىڭ شاقىرىم جول جوندەلەدى. «بيىل 2600 شاقىرىم جولدى اسفالتتى- بەتوندى جابىندىمەن جاپساق دەيمىز. بۇل - رەكوردتىق كورسەتكىش. اتاپ ايتقاندا قاراعاندى - بالقاش - الماتى جولدارى وسى جابىندىمەن قامتىلادى. ءقازىر وسى ارالىقتا قىزۋ جۇمىس جۇرگىزىلۋدە. اقتوبە - اتىراۋ - استراحان جولىندا دا جۇمىس قارقىندى. ۇزىناعاش - وتار، قارابۇتاق - كومسومولسكايا - دەنيسوۆكا - قوستاناي، ءۇشارال - دوستىق، نۇر- سۇلتان - پەتروپاۆل، تاسكەسكەن - باقتى، تالدىقورعان - وسكەمەن، مەركە - بۋرىلبايتال جولىندا دا جوندەۋ جۇمىستارى جالعاسۋدا»، - دەدى ول.
اۆتور: ايان بەكەن ۇلى