ش ى ۇ: 2024-جىلى قىتايدا تەرروريزمگە قارسى بىرلەسكەن وقۋ-جاتتىعۋ وتەدى
بۇگىن استانادا قازاقستاننىڭ توراعالىعىمەن شانحاي ىنتىماقتاستىق ۇيىمىنىڭ (ش ى ۇ) وڭىرلىك تەرروريزمگە قارسى قۇرىلىم كەڭەسىنىڭ 40-وتىرىسى ءوتتى. وتىرىس قورىتىندىسى بويىنشا قاتىسۋشى ەلدەر بىرلەسكەن مالىمدەمە جاسادى.
«بۇگىنگى كەڭەستە تەرروريزمگە، ەكسترەميزمگە جانە سەپاراتيزمگە قارسى كۇرەس ماسەلەلەرى بويىنشا بۇرىن قابىلدانعان شەشىمدەردىڭ ىسكە اسىرىلۋ بارىسى قارالدى. لاڭكەستىك ارەكەتتەرگە قارسى ءىس-قيمىل جانە ساراپتامالىق توپتاردىڭ وزەكتى ماسەلەلەر بويىنشا جۇمىس جوسپارلارى بەكىتىلدى. اۋە جولاۋشىلارى تۋرالى الدىن الا اقپارات جۇيەلەرىن پايدالانۋدىڭ حالىقارالىق تاجىريبەسىن زەردەلەۋ، سونداي-اق شىۇ مەملەكەتتەرىنىڭ وسى سالاداعى ۇلتتىق تاجىريبەسىن تالداۋ قورىتىندىلارى ماقۇلداندى»، - دەدى ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى رۋسلان سەيسەمبايەۆ بىرلەسكەن مالىمدەمەنى وقي وتىرىپ.
مالىمدەمەدە ايتىلعانداي، وتىرىستا تەرروريزمدى قارجىلاندىرۋ ارنالارىنىڭ جولىن كەسۋ جانە انىقتاۋ، سونداي-اق قارۋدىڭ زاڭسىز اينالىمىنا قارسى ءىس-قيمىل جونىندەگى ىنتىماقتاستىق ماسەلەلەرى دە ءسوز بولدى.
«ءۇندىستان اۋماعىندا پراكتيكالىق ىنتىماقتاستىقتى كۇشەيتۋ ءۇشىن ينتەرنەت جەلىسىن تەرروريستىك جانە ەكسترەميستىك ماقساتتاردا پايدالانۋدىڭ جولىن كەسۋ بويىنشا پراكتيكالىق سەمينار مەن تەرروريزمگە قارسى وقۋ-جاتتىعۋ جوسپارلانعان. 2024-جىلى ق ح ر اۋماعىندا تەرروريزمگە قارسى بىرلەسكەن وقۋ-جاتتىعۋ وتكىزۋ تۋرالى شەشىم قابىلداندى. ەكسترەميستىك يدەولوگياعا قارسى ءىس-قيمىل بويىنشا بىرلەسكەن ىنتىماقتاستىق باعدارلاماسىن ازىرلەۋ باستالدى. ش ى ۇ ەلدەرىنىڭ لاڭكەستىك تاقىرىبىنا ارنالعان كەزەكتى وتىرىستى قىتايدا وتكىزۋدى جوسپارلاپ وتىرمىز»، - دەدى رۋسلان سەيسەمبايەۆ.