ەلىمىزدە 2024 -جىلى بۇكىلالەمدىك ساياساتتانۋشىلار كونگرەسى ءوتۋى مۇمكىن
بۇل تۋرالى قازاقستاننىڭ ساياسي زەرتتەۋلەر قاۋىمداستىعىنىڭ پرەزيدەنتى ەسەنجول الياروۆ حابارلادى، دەپ حابارلايدى قازاقپارات ءتىلشىسى.
«ءبىز پرەزيدەنت اكىمشىلىگىمەن كەلىسە وتىرىپ، 2024 -جىلى قازاقستاندا بۇكىلالەمدىك ساياساتتانۋشىلار كونگرەسىن وتكىزۋگە ءوتىنىم بەرۋدى جوسپارلاپ وتىرمىز»، - دەدى ەسەنجول الياروۆ ەلوردادا وتكەن قازاقستان ساياساتتانۋشىلارىنىڭ كونگرەسىندە.
سونىمەن بىرگە، قاۋىمداستىق باسشىسى قازاقستاننىڭ ساياسي زەرتتەۋلەر قاۋىمداستىعى مەن ساياسي عىلىم قاۋىمداستىعىن ءبىر ۇيىمعا بىرىكتىرۋ جونىندە شەشىم قابىلدانعانىن ايتتى.
«بۇگىنگى كۇنگە دەيىن ەلىمىزدە ەكى قاۋىمداستىق جۇمىس ىستەپ كەلدى: ساياسي عىلىم قاۋىمداستىعى جانە ساياسي زەرتتەۋلەر قاۋىمداستىعى. ءبىز ەكى ۇيىمدى ساياسي زەرتتەۋلەر قاۋىمداستىعىنا قوسۋ تۋرالى شەشىم قابىلدادىق. سەبەبى، ساياسي زەرتتەۋلەر ينستيتۋتى بۇكىلالەمدىك ساياسي عىلىم قاۋىمداستىعىنىڭ مۇشەسى سانالادى»، - دەپ ءتۇسىندىردى ول.
ايتا كەتەيىك، بۇگىن قازاقستان ساياساتتانۋشىلارىنىڭ كونگرەسى ءوز جۇمىسىن باستادى. كونگرەسس اياسىندا قازاقستانداعى ساياسي عىلىمنىڭ دامۋ كەلەشەگى، 2020 -جىلى ليسسابوندا وتەتىن بۇكىلالەمدىك ساياساتتانۋشىلار كونگرەسىنە قاتىسۋ ماسەلەلەرى تالقىلاندى.