2024 -جىلى كىمدەردىڭ جالاقىسى وسەدى؟
ەڭبەك جانە حالىقتى الەۋمەتتىك قورعاۋ مينيسترلىگى وكىلدەرى 2024 -جىلى كىمدەردىڭ جالاقىسى قالاي وسەتىنىنە جاۋاپ بەردى.
Tengrinews.kz-كە بەرگەن ۆەدومستۆونىڭ رەسمي جاۋابىندا مينيسترلىك ەڭبەك زاڭناماسىنا سايكەس ازاماتتىق قىزمەتكەرلەرگە ەڭبەكاقى تولەۋدى رەتتەيتىنى ايتىلادى. ولاردىڭ ەڭبەگىنە اقى تولەۋ جۇيەسى مەملەكەتتىك مەكەمەلەر مەن قازىنالىق كاسىپورىنداردىڭ بارلىق قىزمەتكەرى ءۇشىن ءبىرىڭعاي سانالادى.
«مەملەكەت باسشىسىنىڭ 2021 -جىلعى 1-قىركۇيەكتەگى «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا ايتىلعان تاپسىرماسىن ورىنداۋ ءۇشىن 2022 -جىلعى 1-قاڭتاردان باستاپ لاۋازىمدىق مىندەتتەرىنە تۇزەتۋ كوەففيتسيەنتىن قولدانۋ ارقىلى ازاماتتىق قىزمەتكەرلەردىڭ جەكەلەگەن ساناتتارىنىڭ (پەداگوگتەردى، مەديتسينالىق جانە الەۋمەتتىك قىزمەتكەرلەردى قوسپاعاندا) جالاقىسىن كەزەڭ-كەزەڭىمەن ارتتىرۋ باستالدى»، - دەلىنگەن جاۋاپتا.
2022 -جىلى بۇل كوەففيتسيەنتتىڭ مولشەرى 1,23 بولسا، 2023 -جىلى 1,45 كە جەتتى. 2024 -جىلى ول 1,71 گە، ال 2025 -جىلى 2,0 گە دەيىن كوتەرىلەدى. وسىلايشا، ءتورت جىل ىشىندە ازاماتتىق قىزمەتكەرلەردىڭ جالاقىسى ەكى ەسەگە وسەدى.
سونداي-اق، مينيسترلىك مەملەكەت باسشىسىنىڭ تاپسىرماسى بويىنشا 2024 -جىلعى 1-قاڭتاردان باستاپ ەڭ تومەنگى جالاقى مولشەرىن (ە ت ج) 70 مىڭنان 85 مىڭ تەڭگەگە دەيىن ارتتىرۋ جوسپارلانعانىن حابارلادى.
مينيسترلىكتىڭ بولجامىنا سايكەس، وسىعان وراي مەنشىكتىڭ ءارتۇرلى نىسانىنداعى كاسىپورىنداردا بارلىق سالادا جۇمىس ىستەيتىن 1,8 ميلليونعا جۋىق جالدامالى قىزمەتكەردىڭ تابىسى وسەدى.
gov.kz مالىمەتىنە سۇيەنسەك، ق ر ەڭبەك كودەكسىنە سايكەس قازىنالىق كاسىپورىندار مەن مەملەكەتتىك مەكەمەلەردە شتاتتىق لاۋازىمدى اتقاراتىن ادامدار ازاماتتىق قىزمەتكەرلەر سانالادى.