ەۋرو-2024: پورتۋگاليا ليۋكسەمبۋرگتى 9:0 ەسەبىمەن جەڭدى

استانا. قازاقپارات - فۋتبولدان 2024 -جىلعى ەۋروپا چەمپيوناتىنا ىرىكتەۋ ساتىسىنىڭ التىنشى تۋرىنداعى ەكىنشى ويىن كۇنى اياقتالدى، دەپ حابارلايدى قازاقپارات ءتىلشىسى.

بۇل كۇنى J توبىندا پورتۋگاليا قۇراماسى ءوز الاڭىندا ليۋكسەمبۋرگ قۇراماسىن قابىلدادى.

ليۋكسەمبۋرگتىك فۋتبولشىلار سوڭعى جىلداردا جاقسى ويىن ورنەگىن كورسەتىپ كەلەدى. بيىلعى جىلى دا سول قارقىندا جوعارى ناتيجەگە قول جەتكىزىپ وتىر. قازىرگە دەيىن 10 ۇپاي جيناپ، تۋرنير كەستەسىندە ءۇشىنشى ورىندا كەلە جاتقان ەدى.

ءبىراق بۇگىنگى كەزدەسۋدە ازۋلى قارسىلاسىنا لايىقتى قارسىلىق كورسەتە العان جوق. تاجىريبەلى پورتۋگاليالىقتار ليۋكسەمبۋرگ فۋتبولشىلارىن ويسىراتا جەڭدى.

كەزدەسۋ بارىسىندا پورتۋگالدىق گونسالۋ يناسيۋ - 12، 45، گونسالۋ رامۋش - 18، 34، ديوگۋ جوتا - 57، 77، ريكاردۋ ورتا - 67، برۋنۋ فەرناندەش - 83، جواو فەليكس 88-مينۋتتا مەرگەندىك تانىتتى.

وسىلايشا پورتۋگاليا 9:0 ەسەبىمەن جەڭىسكە جەتتى.

سونداي-اق اتالعان توپتا سلوۆاكيا ليحتەنشتەيندى 3:0، يسلانديا مەن بوسنيا جانە گەرتسوگوۆينانى 1:0 ەسەبىمەن جەڭدى.

ال D توبىندا ءوز الاڭىندا ارمەنيا حورۆاتياعا 0:1، لاتۆيا ۋەلسكە 0:2 ەسەبىمەن ەسە جىبەردى.

ەسكە سالساق، 11-قىركۇيەكتە قازاقستان قۇراماسى ءوز الاڭىندا سولتۇستىك يرلانديادان باسىم ءتۇستى.