قادىر ءتۇنى - 2023. قاشان بولادى جانە قالاي وتكىزۋ كەرەك؟
قادىر ءتۇنى اراب تىلىندە ليايلياتۋل-كادر نەمەسە ال-كادر دەپ ايتىلادى. ماعىناسى «قاسيەتتى، قادىرلى، قۇدىرەتتى، ماڭىزدى ءتۇن» دەگەندى بىلدىرەدى. قادىر تۇنىندە مۇحاممەد پايعامبارعا جابىرەيىل پەرىشتە كەلىپ، قۇراندى بەرگەن دەپ سانالادى. بۇل رامازان ايىنىڭ اياعى، ياعني ون ءتۇنىنىڭ ءبىرى بولعان. ورازا ايىندا مىڭ ايدان دا قادىرلى ءتۇن بار ەكەنى ايتىلادى. بۇل ءتۇن قادىر تۇنىنە سايكەس كەلەدى. قادىر ءتۇنى تۋرالى قۇران كارىمنىڭ «قادىر سۇرەسىندە» دە ايتىلعان.
قۇراندا قادىر ءتۇنى ورازانىڭ سوڭعى ون ءتۇنىنىڭ بىرىندە ەكەنى ايتىلعان، ءبىراق ناقتى كۇنى ايتىلماعان. بۇل ءتۇنى پەرىشتەلەر جەرگە ءتۇسىپ، بەرەكە ورنايدى دەپ سانالادى. پەرىشتەلەردىڭ جەرگە ءتۇسۋى قادىر ءتۇنىنىڭ ماڭىزدى ەكەنىن كورسەتەدى.
حالىق اراسىندا تانىمال نۇرلان يمام ءبىر سوزىندە بۇل تاعدىر ءتۇنى ەكەنىن ايتىپ ءوتتى.
«قادىر ءتۇنى ورازانىڭ سوڭعى ون كۇنىندە، تاق كۇنگە كەلەدى دەپ ايتادى. ءبىراق ەندى كەيبىر كەزدە جۇپقا ءتۇسىپ قالۋى مۇمكىن. قادىر ءتۇنى - تاعدىر ءتۇنى. قادىر ءتۇنىن قاتتىراق كۇتۋگە تىرىسۋ كەرەك. سەبەبى كەم دەگەندە ءبىر جىلدىق ءومىرى جازىلادى. مىسالى، بىرەۋ تاعدىرى شەشىلىپ جاتقاندا ۇيىقتاپ جاتپايدى عوي»، - دەيدى ول Youtube كانالىندا.
قادىر تۇنىندە نە ىستەۋ كەرەك؟
قادىر ءتۇنى باستالعانعا دەيىن تولىق دارەت العان ءجون، سونىمەن قاتار، تەرىس ويلاردان جانى مەن جۇرەگىن اۋلاق ۇستاعان دۇرىس. وسى تۇندە جاساعان كۇنالار ءۇشىن كەشىرىم سۇراپ، وكىنىپ، كوپ دۇعا ەتكەن ءجون. قۇلشىلىق جاساپ، ساۋاپقا كەنەلەتىن ەڭ ۇتىمدى ۋاقىت - قادىر ءتۇنى. سونىمەن قاتار، قۇران وقىپ، ماعىناسىن ءتۇسىنىپ، ءدىني ءبىلىم العان ابزال ەكەنى ايتىلادى.
قادىر تۇنىندە نە ىستەمەۋ كەرەك؟
· زيان نارسەلەردەن اۋلاق بولعان ءجون.
· دىندە رۇقسات ەتىلمەگەن نارسەلەردى ىستەۋگە بولمايدى. مىسالى، ىشىمدىك ىشۋگە بولمايدى.
· بىرەۋدىڭ سىرتىنان عايبات ايتۋعا، بوس اڭگىمەگە ءۇيىر بولۋعا بولمايدى.
· تۇندە ۇيىقتاماعان ابزال، ونىڭ ورنىنا قۇلشىلىق ەتكەن ءجون.
· ۇرىسۋعا، بىرەۋ تۋرالى جامان نارسە ايتۋعا بولمايدى.
· فيلمدەر مەن ويىن-ساۋىق باعدارلامالارىن كورىپ، ۋاقىتتى بوس وتكىزۋگە بولمايدى.
نۇرلان يمام بۇل ءتۇندى شاما كەلگەنشە قۇلشىلىقپەن وتكىزۋگە كەڭەس بەردى.
«ءبىر نارسەنى ءتۇسىنۋ كەرەك، ءتۇنىن ەمەس، تاڭىن اتقىزۋ كەرەك. كوبىسى ءتۇنىن وتكىزەدى دە، تاڭعى ۋاقىتتا ۇيىقتاپ قالادى. بىزدەگى قاتەلىك وسى. ۇيىقتاماۋعا تىرىسۋ كەرەك جانە شاما كەلگەنشە قۇلشىلىق عيبادات، جاقسى امالدار جاساۋ كەرەك. دۇعالاردىڭ قابىل بولاتىن كەزىندە ادەتتە ادامدار كىشكەنە قول جايادى دا توقتاپ قالادى عوي، توقتاماي دۇعا قىلا بەرۋ كەرەك. ءبىر دۇعادان كەيىن تاعى ءبىر دۇعا، شاي ءىشىپ وتىرىپ تا دۇعا ەتە بەرۋ كەرەك. قاسىڭىزدا تۇرعان پەرىشتەلەر «ءاۋمين» دەسە، ءىسىڭىزدىڭ ءبارى وڭىنان جۇرەدى. تاعدىرلى تۇندەرىڭىزدە تاعدىرعا اسەر ەتەتىن كوپ جاقسى امالدار جاساۋ كەرەك»، - دەيدى يمام بەينەروليكتە.
قىدىر اتا كەلە ما؟
سونداي-اق ول بۇل ءتۇنى قىدىر اتانى كۇتۋدىڭ قاجەتى جوق ەكەنىن ايتتى.
«قادىر ءتۇنى كەيبىر ادامدار اسپاندى قاراپ، بىردەڭە ءوتتى مە دەپ قارايدى جانە سول كۇنى ءبىر نارسە كەلەدى دەپ كۇتەدى. قىدىر اتاشكا، قىدىر اپاشكا دەگەن كەيىپكەرلەر جوق. ەشكىمدى كۇتۋدىڭ كەرەگى جوق. ال كەيبىرەۋلەر تەرەزەنى اشىپ قويادى، شەكەر قويادى، داستارحان جايادى. ەشكىم كەلمەيدى، ەشكىمدى كۇتپەۋ كەرەك. كىمدە كىم كۇتسە، كوزىنە ەلەستەپ، ونىڭ اداسىپ كەتۋ قاۋپى بار. بۇل بىرەۋدى كۇتىپ ەسەپ ايىرىساتىن كۇن ەمەس، «مەن وتىرامىن، مەن وتىرۋ ءۇشىن ماعان مىناۋ كەلۋ كەرەك، قادىر كەلۋ كەرەك» دەگەن جوق. بۇل تەك قۇلشىلىق ءتۇنى»، - دەپ ەسكەرتتى يمام.
Massaget.kz