قازاقستان مەن قىرعىزستان اراسىنداعى تاۋ وتكەلدەرى ساياحاتشىلار ءۇشىن 2023 -جىلى اشىلماق
جاقىندا الماتى قالاسىنان ىستىقكولگە سارىبۇلاق اسۋى ارقىلى پيلوتتىق ساپار جاسالدى. قازاقستان مەن قىرعىزستاننىڭ شەنەۋنىكتەرى، بيزنەسمەن، دەپۋتات جانە قوعام قايراتكەرلەرىنەن قۇرالعان توپتىڭ ءۇش كۇندىك ساياحاتى ىستىقكول وبلىسى ءتۇپ اۋدانى بالباي باتىر اۋىلىندا اياقتالدى. ساياحاتشىلار تاۋلى جولدارمەن 25 شاقىرىمنان استام قاشىقتىقتى جاياۋ ءجۇرىپ ءوتتى. ۇيىمداسقان تۇردە كولسايداعى ءۇش كولگە سوعىپ، تەڭىز دەڭگەيىنەن 3270 مەتر بيىكتىكتەگى سارىبۇلاق اسۋىنا كوتەرىلىپ، ىستىقكول القابىنا ءتۇستى.
مارشرۋتتى پيلوتتىق ءجۇرىپ ءوتۋ بارىسىندا تابيعي سيپاتتاعى ىقتيمال قاتەرلەر تۇرعىسىنان جەرگىلىكتى جەرگە زەرتتەۋ جۇرگىزىلدى، شەكارانى كەسىپ ءوتۋ ءراسىمى پىسىقتالدى، سوقپاقتاردىڭ جاي- كۇيى تۋرالى دەرەكتەر جاڭارتىلدى.
تانىمال تاۋ وتكەلدەرى ترەككينگ، ات نەمەسە ەكسترەمالدى ۆەلوسيپەد تۋرلارىن ۇناتاتىندارعا، قازاقستاندىق جانە قىرعىزستاندىق تۋريستەر مەن الىس شەت ەلدەردەن كەلەتىن ساياحاتشىلاردى قىزىقتىرۋى مۇمكىن.
قازاقستان مەن قىرعىزستاننىڭ پارلامەنتاريلەرى، ق ر «اتامەكەن» ۇلتتىق كاسىپكەرلەر پالاتاسى باسقارماسىنىڭ ءتوراعاسى، قىرعىزستان تۋريزمدى دامىتۋدى قولداۋ قورىنىڭ ءتوراعاسى تاۋ مارشرۋتىن اشۋعا دايىندىق بويىنشا اۋقىمدى جۇمىس جۇرگىزدى. وسى جىلدىڭ ءساۋىر ايىندا بارلىق پروبلەمالىق ماسەلەلەردى رەتتەۋگە جانە ترانسشەكارالىق باعىتتاردى جانداندىرۋعا باعىتتالعان «Kaz Alpine Club» قازاقستان قوعامدىق بىرلەستىگى مەن «كاتو» ا ا ق قىرعىزستان تۋروپەراتورلار قاۋىمداستىعى اراسىندا ىنتىماقتاستىق تۋرالى مەموراندۋمعا قول قويىلعان بولاتىن. تاياۋدا تۋريزم سالاسىنداعى قۇزىرلى ورگاندار ارنايى ۇكىمەتارالىق كەلىسىمگە قول قويادى دەگەن جوسپار بار.