قاتار-2022: ا توبىندا جارىستى قاي قۇراما جالعاستىرادى
اتالعان توپتاعى ەكى ويىن دا ەلوردا ۋاقىتىمەن 21:00-دە باستالادى.
قازىرگە دەيىن تۋرنير كەستەسىندە نيدەرلاند – 4، ەكۆادور مەن سەنەگال - 3 ۇپاي ەنشىلەپ تۇر. بۇل قۇرامالاردىڭ جارىستى جالعاستىرۋ مۇمكىندىگى بار. ال ەكى تۋردا ۇپايسىز قالعان قاتار توپتىق كەزەڭنەن ارىگە بارا المايدى.
نيدەرلاند پەن قاتار كەزدەسۋى «Qazaqstan» تەلەارناسىنان تىكەلەي ەفيردە كورسەتىلەدى.
ويىن ەل-حاۋر قالاسىنداعى 68895 جانكۇيەرگە ارنالعان «ەل-بايت» ستاديونىندا وتكىزىلەدى. باس تورەشى - گامبيالىق باكاري گاسساما.
ەكى قۇراما ءوز تاريحىندا تۇڭعىش مارتە كەزدەسەدى.
بۇل توپتاعى ەكۆادور مەن سەنەگال ويىنىن جانكۇيەرلەر «Qazsport» تەلەارناسىنان تاماشالاي الادى.
ويىن ەل استاناسى دوحا قالاسىنداعى 45857 جانكۇيەرگە ارنالعان «حاليفا ينتەرنەيشنل» ستاديونىندا بولادى. باس تورەشى - فرانتسيالىق كلەمان تيۋرپەن.
ەكى قۇراما ءوز تاريحىندا ەكىنشى مارتە وينايدى. 2002 -جىلى وتكەن جولداستىق كەزدەسۋدە سەنەگال 1:0 ەسەبىمەن باسىم تۇسكەن ەدى.
سونداي-اق، 1.00-دە ۆ توبىندا ۋەلس پەن انگليا، يران مەن ا ق ش قۇرامالارى شەبەرلىك بايقاسادى.
ەسكە سالساق، بۇدان بۇرىن برازيليا رەكوردتىق كورسەتكىشكە قول جەتكىزدى.