2022-جىلدىڭ ماۋسىم ايىندا اۋا رايى قانداي بولادى؟

نۇر-سۇلتان. قازاقپارات – ماۋسىم ايىنىڭ باسىندا قازاقستاننىڭ باتىس جانە وڭتۇستىك وڭىرلەرىندە جازعى اۋا رايى ساقتالادى. كۇندىز 25+33+ گرادۋس، ماڭعىستاۋ وبلىسىنىڭ وڭتۇستىگىندە الدەقايدا ىستىق: 38+ گرادۋس.

ەلىمىزدىڭ باتىسىن قوسپاعاندا، قازاقستاننىڭ كوپتەگەن وبلىستارىندا اتموسفەرالىق فرونتتاردىڭ وتۋىمەن قىسقا مەرزىمدى جاڭبىر جاۋادى، كەي جەرلەردە نايزاعاي، بۇرشاق جانە قاتتى جەل كۇتىلەدى.

تەمپەراتۋرا فونى سالىستىرمالى تۇردە تومەن - كۇندىز 15+23+ گرادۋس، ەلدىڭ شىعىسى مەن وڭتۇستىك-شىعىسىندا 20+28+ گرادۋس.

ەلدىڭ سولتۇستىك-باتىس بولىگىندە تۇندە، سولتۇستىك انتيتسيكلونمەن اۋا تەمپەراتۋراسىنىڭ تومەندەۋى مۇمكىن.

ماۋسىمنىڭ ءبىرىنشى ونكۇندىگىنىڭ ورتاسىنا قاراي، جەرورتا تەڭىزى مەن ورتا ازيانىڭ شىعىس جاعالاۋىنان كەلەتىن اۋا ماسسالارى، رەسپۋبليكانىڭ اۋماعىندا وتە ىستىق اۋا رايىن تۋىنداتادى، سولايشا تەرمومەتر باعاندارى 28+36+ گرادۋس بەلگىسىنە دەيىن، قازاقستاننىڭ شەتكى وڭتۇستىك-باتىسى مەن وڭتۇستىگىندە جەكەلەگەن كۇندەرى 40+ گرادۋس دەيىن كوتەرىلۋى مۇمكىن.

ءبىرىنشى ونكۇندىكتىڭ سوڭىندا جانە ەكىنشى ونكۇندىكتىڭ باسىندا - رەسپۋبليكانىڭ باتىسىندا، سودان كەيىن ەلدىڭ قالعان اۋماعىندا جىلۋدىڭ تومەندەۋى بولجانادى.

ماۋسىمنىڭ ەكىنشى جانە ءۇشىنشى ونكۇندىگىندە ەكپىندى جەل، نايزاعاي، بۇرشاق، شاڭدى داۋىلمەن قىسقا مەرزىمدى جاڭبىر ىستىق، تۇراقتى اۋا رايىمەن الماستىرىلادى.

اۋا تەمپەراتۋراسىنىڭ اۋىتقۋى بولجانادى:

- قازاقستاننىڭ سولتۇستىك جارتىسىندا تۇندە 15+22+ گرادۋستان 5+13+ گرادۋسقا دەيىن، كۇندىز 28+36+ گرادۋستان 18+25+ گرادۋسقا دەيىن؛

- ەلدىڭ وڭتۇستىك جارتىسىندا تۇندە 18+26+ گرادۋستان 10+16+ گرادۋسقا دەيىن، كۇندىز 33+42+ گرادۋستان 25+30+ گرادۋسقا دەيىن.

ەسكەرتپە: ءبىر ايعا ارنالعان اۋا رايى بولجامىن كەڭەس رەتىندە پايدالانۋ كەرەك، ول كەيىننەن سينوپتيكالىق جاعدايدىڭ وزگەرۋىنە قاراي تۇزەتىلەدى جانە ونكۇندىككە ارنالعان اۋا رايى بولجامدارىمەن ناقتىلانادى.