جاس كوللەكسيونەرلەردىڭ ارقاسىندا ەڭ ءىرى اۋكتسيون ۇيلەرى دە بۇرىن- سوڭدى بولماعان تابىسقا كەنەلدى. اعىمداعى جىلى تىركەلگەن رەكوردتاردىڭ ءبىرسىپىراسىن ءتىلشىمىز توپتاستىرعان ەكەن.
سوعان زەر سالساق. «گۋگل» كوشتەن قالدى. بيىل الەمدە ەڭ كوپ قولدانىلعان سايتتار تىزىمىندە العاش رەت قىتايلىق تيكتوك جەلىسى توپ جاردى. اتالعان جۇيە تامىزدىڭ ورتاسىنان بەرى ەشكىمگە كوش تىزگىنىن بەرمەي كەلەدى. بۇعان الەمدى جايلاعان كوروناۆيرۋس ىندەتى اسەر ەتسە كەرەك. ۇيدە قامالعان قولدانۋشىلار قوسىمشاداعى قىسقا روليكتەردى كورىپ، جەلىگە ءجىپسىز بايلانىپ قالدى. بۇگىندە تيكتوكتى جۇكتەگەندەر سانى 1 ميللياردتان اسادى. ءوتىپ بارا جاتقان جىلدا اۋكسيون ۇيلەرى دە رەكورد ورناتتى. الەمدەگى ەڭ ءىرى ۇشتىك «سوتبيس»، «كريستيس» جانە «فيلليپستىڭ» جىلدىق تابىسى 15 ميلليارد دوللاردى قۇرادى. تەك ءسوتبيستىڭ ءوزى جالپى قۇنى 7,5 ميلليارد دوللارعا جۋىق ونەر تۋىندىلارىن ساتقان. بۇل ساۋدا ءۇيىنىڭ ىرگەسى قالانعان كەزدەن بەرى بولماعان رەكورد. ال «كريستيس» كەيىنگى 5 جىلدا العاش رەت 7 ميلليارد دوللاردان استام قارجى تاپقان. ساراپشىلاردىڭ ايتۋىنشا، مۇنداي كورسەتكىش جاس كوللەكتسيونەردىڭ ارقاسى ەكەن.
وليۆيا گوش، اۋكسيونيست:
- ىندەت ۋاقىتىندا ونلاين- اۋكتسيوندار قارىشتاپ دامىپ جاتىر. اتالعان يندۋستريا پاندەميانى ەڭسەرىپ قانا قويماي، وڭ وزگەرىستەرگە قول جەتكىزدى. 2021 -جىل ەل ەسىندە اۋا تەمپەراتۋراسىنىڭ رەكتوردىق دەڭگەيگە جەتۋىمەن دە ەستە قالادى.
ا ق ش- تىڭ مۇحيت جانە اتموسفەرانى زەرتتەۋ جونىندەگى ۇلتتىق باسقارماسى كەلتىرگەن دەرەككە سايكەس، بيىلعى شىلدە جەر بەتىندەگى ەڭ ىستىق اي بولعان. قۇرلىق پەن مۇحيتتاعى ورتاشا اۋا تەمپەراتۋراسى وتكەن عاسىرداعى كورسەتكىشتەن شامامەن 1 گرادۋستان اسىپتى. ءبىر جىلعا كەشىگىپ وتكەن توكيو وليمپياداسىن دا رەكوردشىلار قاتارىنا قوسۋعا بولادى. ءدۇبىرلى دوداعا قاتىسقان بۇرىمدىلار سانى بويىنشا رەكورد تىركەلدى.
سپورتشىلاردىڭ جارتىسىنا جۋىعى ايەلدەر بولدى. شەكتەۋ شارالارىنا بايلانىستى كوبى جازعى ويىنداردى كوزبەن كورە الماعاندىقتان، جارىس ترانسلياتسياسى دا جوعارى رەيتينگ جينادى. بۇدان بولەك، ءتورتجىلدىقتىڭ باستى باسەكەسىن ۇيىمداستىرۋعا 15 ميلليارد دوللاردان استام قارجى جۇمسالىپ، جازعى وليمپيادا ويىندارىنىڭ تاريحىنداعى ەڭ قىمباتى بولىپ ەستە قالدى. ال رەسەيلىك كينەماتوگرافيستەر عارىشتا فيلم ءتۇسىرىپ، ءدۇيىم جۇرتتى تاڭداي قاقتىردى. ويتكەنى مۇنداي ءتۇسىرىلىم ادامزات تاريحىندا بۇرىن- سوڭدى بولماعان. بەسىنشى قازان كۇنى ءبىر توپ مامان بايقوڭىرداعى كەمەمەن كوككە كوتەرىلىپ، حالىقارالىق عارىش ستانتسياسىندا ەكى اپتا وتكىزدى. فيلمنىڭ ءتۇسىرىلىم جۇمىستارى ءالى دە جالعاسىپ جاتىر. تۇساۋكەسەرى كەلەر جىلدىڭ اياعىندا بولادى.
يۋليا پەرەسيلد، اكتريسا:
- ءتۇرلى قيىندىقتارعا، قانشاما اۋىرلىقتاردى باسىمىزدان وتكەرگەنىمىزگە قاراماستان ونىڭ ىسكە اساتىنى تۋرالى ويلاۋدىڭ ءوزى كەرەمەت. اعىمداعى جىل كوروناۆيرۋسقا قارسى ۆاكسينالاردىڭ سانىمەن دە تاريحتا قالارى ءسوزسىز.
الەم عالىمدارى قاۋىپتى ينفەكتسيانى ەمدەۋگە ارنالعان جۇزدەن استام پرەپارات جاساپ شىقتى. ونىڭ ىشىندە قازاقستاندىق ماماندار دا بار. QazVac دەپ اتالاتىن يناكتيۆتى ۆاكتسينانى وتاندىق عىلىمنىڭ جەتىستىگى دەۋگە بولادى. ءقازىر اتالعان ءدارى دۇنيەجۇزىلىك دەنساۋلىق ساقتاۋ ۇيىمىنىڭ اككرەديتاتسياسىنان ءوتىپ جاتىر. عالىمداردىڭ ايتۋىنشا، بۇل ەل تاريحىنداعى ايتۋلى وقيعا ءارى تۇڭعىش تاجىريبە.
www.24.kz