وسىعان بايلانىستى ۇيىم 2021 -جىلدى حالىقارالىق كوكونىستەر مەن جەمىستەر جىلى دەپ جاريالادى. بۇل تۋرالى قازاقپارات بىرىككەن ۇلتتار ۇيىمىنىڭ سايتىنا سىلتەمە جاساي وتىرىپ حابارلايدى.
بۇل جىل كوكونىستەر مەن جەمىستەردىڭ تاعامدىق قۇندىلىعى تۋرالى اقپارات تاراتۋعا جانە سالاۋاتتى ءومىر سالتىن ۇستانۋدى ناسيحاتتاۋعا ارانالادى. تۋريزم سالاسى جاقسى دامىعان جانە ينتەرنەتكە قولجەتىمدى جاھاندانۋ داۋىرىندە ءومىر ءسۇرىپ جاتقان ادامداردى اسا بەلگىلى ەمەس ازىق- تۇلىك ونىمدەرىمەن تاڭقالدىرۋ وتە قيىن. الايدا، ب ۇ ۇ ازىق- تۇلىك جانە اۋىل شارۋاشىلىعى ۇيىمىنىڭ مالىمەتتەرى بويىنشا كوكونىستەر مەن جەمىستەردىڭ سيرەك كەزدەسەتىن، ءتىپتى ءبىز اتىن ەستىپ كورمەگەن، ۇمىتىلعان تۇرلەرى بار. ول تۋرالى ءارتۇرلى سەبەپتەرمەن ۇمىتىپ كەتەدى: داعدى مەن تالعام وزگەرەدى، كەيبىر وسىمدىك تۇرلەرىن ءوسىرۋ قيىنداي تۇسۋدە، كەي جاعدايدا ونى وسىرۋگە جەتكىلىكتى دەڭگەيدە جاعداي جاسالماعان. ۇمىتىلىپ بارا جاتقان كوكونىستەر مەن جەمىستەر ىشىندە الدەبىر مەملەكەت، الدەبىر اۋماققا جاقسى بەيىمدەلگەنى بار جانە ونىڭ قۇرامى دارۋمەندەرگە باي.
سونىمەن قاتار، سيرەك كەزدەسەتىن داقىلداردىڭ جوعارى كوممەرتسيالىق الەۋەتى بار جانە ەگەر ولار ءۇشىن قولايلى نارىق تابىلسا، ۇساق شارۋا قوجالىقتارىنىڭ كىرىس كوزىنە اينالۋى مۇمكىن. ۇيىمنىڭ سايتىندا سيرەك كەزدەسەتىن كوكونىستەر مەن جەمىستەردىڭ تۇرلەرى كەلتىرىلگەن، ولاردىڭ قاتارىندا تىكەندى وپۋنتسيا نەمەسە كاكتۋستى المۇرت، مورينگا، يسپان ارتيشوگى جانە امارانت بار.