جەر كودەكسىنىڭ كەيبىر نورمالارىنا ەنگىزىلگەن موراتوري 2021-جىلدىڭ سوڭىنا دەيىن ۇزارتىلادى

استانا. قازاقپارات - ءماجىلىس دەپۋتاتتارى جەر كودەكسىنىڭ جەكەلەگەن نورمالارىنىڭ قولدانىسىن 2021-جىلدىڭ 31- جەلتوقسانىنا دەيىن توقتاتا تۇرۋدى كوزدەيتىن زاڭ جوباسىن ماقۇلدادى.

اتالعان زاڭ جوباسىن ق ر پارلامەنتى ءماجىلىسىنىڭ جالپى وتىرىسىندا ق ر پرەمەر-ءمينيسترىنىڭ ورىنباسارى-اۋىل شارۋاشىلىعى ءمينيسترى اسقار مىرزاحمەتوۆ تانىستىردى، دەپ حابارلايدى قازاقپارات.

«سىزدەردىڭ تالقىلاۋلارىڭىزعا ۇسىنىلىپ وتىرعان زاڭ جوباسى مەملەكەت باسشىسىنىڭ ۇستىمىزدەگى جىلدىڭ 18- تامىزىندا قابىلداعان جارلىعىنا سايكەس ەنگىزىلىپ وتىر. جەر رەفورماسىنا بايلانىستى قابىلدانعان كەيبىر شەشىمدەردىڭ قوعامدىق پىكىر تۋدىرۋىنا وراي ورىن العان پروبلەمالاردى تالقىلاي كەلە، موراتوري جاريالانعان بولاتىن. وعان وراي ۇستىمىزدەگى جىلى 30- ماۋسىمدا ءتيىستى زاڭ قابىلدادى. سول زاڭدا موراتوريدىڭ مەرزىمى اعىمداعى جىلدىڭ 31- جەلتوقسانىنا دەيىن دەپ بەلگىلەنگەن ەدى»، - دەدى ول.

وسى رەتتە ءمينيستردىڭ ايتۋىنشا، جەر سالاسىنداعى پروبلەمانى جەر كوميسسياسى قاراعان كەزدە اۋىل شارۋاشىلىعى سالاسىنداعى جەرلەردىڭ دەرەكتى قورىن جاساۋ، قولدانىستاعى كوپتەگەن نورمالارعا وزگەرتۋلەر ەنگىزۋ، ونىڭ ىشىندە اۋىل شارۋاشىلىعى ماقساتىنداعى جەرلەردىڭ كاداسترلىق قۇنىن قايتا قاراۋ ماسەلەلەرى كوتەرىلگەن.

«وسىعان سايكەس، جەر كوميسسياسى مەملەكەت باسشىسىنا ۇسىنىسپەن شىقتى. ول ۇسىنىس ق ر پرەزيدەنتى تارابىنان قولداۋ تاۋىپ، ارنايى جارلىقپەن 2016-جىلدىڭ 31- جەلتوقسانىنان 2021-جىلعى 31- جەلتوقسانعا دەيىن ۇزارتىلىپ وتىر. سىزدەرگە ەنگىزىلگەن زاڭ جوباسىندا وسى ءبىر عانا ماسەلە قارالادى»، - دەدى مىرزاحمەتوۆ.

اۆتور: مارلان جيەمباي