2021 -جىلدىڭ 5 ايىندا ج ءى و ءوسىمى 1,6 پايىزدى قۇرادى
بۇل تۋرالى ق ر پارلامەنتى پالاتالارىنىڭ بىرلەسكەن وتىرىسىندا پرەمەر- مينيستر اسقار مامين ايتتى، دەپ حابارلايدى قازاقپارات ءتىلشىسى.
«بيىل قازاقستان ەكونوميكاسى بەلسەندى تۇردە قالپىنا كەلۋدە. بەس ايدىڭ قورىتىندىسى بويىنشا جالپى ىشكى ءونىمنىڭ ءوسىمى 1,6 پايىزدى قۇرادى. ەكونوميكانىڭ بارلىق سالالارىندا وڭ ءوسىم بايقالۋدا. رەسپۋبليكا بويىنشا وڭدەۋشى ونەركاسىبى ەكونوميكانىڭ نەگىزگى درايۆەرلەرىنىڭ ءبىرى بولدى. سونىڭ ىشىندە، ماشينا جاساۋ، حيميا ونەركاسىبى، فارماتسيەۆتيكا جانە جەڭىل ونەركاسىپ جوعارعى ءوسىمدى كورسەتتى»، - دەدى ۇكىمەت باسشىسى.
ونىڭ اتاپ وتۋىنشە، قۇرىلىس سالاسى مەن تۇرعىن ءۇيدى پايدالانۋعا بەرۋ بويىنشا ءوسۋ قارقىنى جوعارى. اۋىل شارۋاشىلىعىندا دا تۇراقتى ءوسۋ قارقىنى بايقالادى.
«قىزمەت كورسەتۋ سالاسىندا ەكى اي قاتارىنان وڭ ءوسۋ سەرپىن بەلگىلەندى. بۇعان سەپتىگىن تيگىزگەن نەگىزى فاكتورلار ساۋدا، بايلانىس، جىلجىمايتىن مۇلىكپەن وپەراتسيالار، قارجى جانە ساقتاندىرۋ قىزمەتى سالالارى بولدى. وندىرىستىك ەمەس سالالاردا جوعارى ينۆەستيتسيالىق بەلسەندىلىك بايقالادى. بۇل ەكونوميكانى ءارتاراپتاندىرۋ ارقىلى ورنىقتى ءارى ساپالى دامۋى ءۇشىن نەگىز بولادى»، - دەدى ول.
ۇكىمەت باسشىسىنىڭ اتاپ وتۋىنشە، نەگىزگى كاپيتالعا ينۆەستيتسيالاردىڭ ءوسىمى تاۋ- كەن ءوندىرۋ ونەركاسىبىن ەسكەرمەگەندە 25,5 پايىزدى قۇرادى.
«قۇرىلىس، وڭدەۋ ونەركاسىبى، ونىڭ ىشىندە تاماق ونىمدەرى ونەركاسىبى، اقپارات جانە بايلانىس، اۋىل شارۋاشىلىعى، ساۋدا، جىلجىمايتىن مۇلىكپەن وپەراتسيالار جانە كولىك سالالارىنا ينۆەستيتسيالار ەلەۋلى ءوستى»، - دەدى اسقار مامين.