«سونار-2020» رەسپۋبليكالىق تۋرنيرى: باس جۇلدەنى اتىراۋلىق بۇركىتشى يەلەندى

اتىراۋ. قازاقپارات - اتىراۋلىق بۇركىتشى «سونار-2020» رەسپۋبليكالىق تۋرنيرىنىڭ باس جۇلدەسىن يەلەندى، دەپ حابارلايدى قازاقپارات.

الماتى وبلىسىنىڭ ەڭبەكشىقازاق اۋدانىنداعى تۇرگەن تاۋىنىڭ جوتاسىندا «سونار-2020» رەسپۋبليكالىق ءتۋرنيرى ءوتتى.

بۇل سايىستا بۇركىت، قارشىعا، سۇڭقار سىندى قۇستارىن ۇشىرىپ، قۇماي تازى جۇگىرتكەن 100 دەن استام قۇسبەگى باق سىنادى.

ولار 34 بۇركىت پەن 14 تازىنى سايىسقا قوستى. سايىسقا اتىراۋ وبلىسىنان قاتىسقان قۇسبەگى ارمان ابدىكارىم ۇلىنىڭ «نارىن» اتتى بۇركىتى تۇلكىگە 16 سەكۋندتا جەتكەن.

ءسويتىپ، اتىراۋلىق بۇركىتشى باس جۇلدە - 1 ميلليون تەڭگەگە يە بولدى. «بيىل «نارىن» التىنشى اڭعا ءتۇستى.

«سايات سايىسىنان ۇدايى جۇلدە الىپ ءجۇرمىز. ءبىر رەت الەم چەمپيوناتىنان، بىرنەشە مارتە ەل چەمپيوناتىنان بايگەگە يە بولدىق. بۇركىت باپتاۋعا اكەم بالا كەزىمدە ۇيرەتتى. ساياتشىلىقتى ءالى دە جالعاستىرا بەرەمىن»، - دەيدى قۇسبەگى ارمان ابدىكارىم ۇلى.