استانادان 2020-جىلعا دەيىن توكيو، سينگاپۋر، شاڭحاي جانە نيۋ-يورك باعىتىنا تىكەلەي اۋە قاتىناستارى اشىلادى
بۇل تۋرالى بۇگىن ماجىلىستە ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتىنىڭ ءتوراعاسى بەكەن سەيداحمەتوۆ ءمالىم ەتتى. ەسكە سالايىق، ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋە كەڭىستىگىن پايدالانۋ جانە اۆياتسيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى وتكەن بولاتىن.
كوميتەت ءتوراعاسىنىڭ ايتۋىنشا، حالىقارالىق اۋە قاتىناستارىن دامىتۋ جوسپارىنا سايكەس قازىرگى تاڭدا قازاقستاندا 88 حالىقارالىق مارشرۋتتار بار. 26 مەملەكەتپەن ۇكىمەتارالىق كەلىسىمدەر جاسالعان.
2015-جىلى 8 جاڭا اۋە مارشرۋتتارى اشىلسا، 2016-جىلى جىل باسىنان بەرى 4 باعدار اشىلىپ، جىل سوڭىنا دەيىن ولاردىڭ سانى 10 عا جەتۋى كۇتىلەدى. «استانا حالىقارالىق قارجى ورتالىعىن قۇرۋعا بايلانىستى قازىرگى كۇنى 6 حالىقارالىق ورتالىقپەن تىكەلەي اۋە بايلانىسى ورناتىلدى. ال 2018-جىلى توكيو مەن سينگاپۋرعا، 2019-جىلى - شاڭحاي، 2020-جىلى - نيۋ-يورك قالالارىنا تىكەلەي اۋە قاتىناستارىن اشۋ جوسپارلانىپ وتىر. نيۋ-يورك نەگە 2020-جىلعا قاراي دەگەنگە كەلسەك، بۇل ماسەلە نەگىزىنەن «ەيراستانا» اۆياكومپانياسىنىڭ جاڭا اۋە كەمەلەرىن ساتىپ الۋ جوسپارىنا دا بايلانىستى بولىپ وتىر»، - دەدى ب. سەيداحمەتوۆ.
ونىڭ ايتۋىنشا، ا ق ش- قا تىكەلەي اۋە قاتىناستارىن اشۋ ءۇشىن امەريكا فەدەرالدىق اۆياتسيالىق قىزمەتتىڭ ءتيىستى اۋديتىنان دا ءوتۋ قاجەت. بۇل بەلگىلى ءبىر مەرزىمدى تالاپ ەتەدى. ماسەلەن، ازەربايجان تىكەلەي ا ق ش- پەن اۋە قاتىناسىن ورناتۋ ءۇشىن ءۇش جىل بويى اۋديتتەن وتكەن. «سوندىقتان دا، ءبىز كەلىسسوزدەردى بۇگىننەن باستاپ قولعا الىپ جاتىرمىز»، - دەدى ب. سەيداحمەتوۆ.
اۆتور: قانات مامەتقازى ۇلى