ەندى «قولجەتىمدى باسپانا-2020» باعدارلاماسىنىڭ كۇشى جويىلدى

استانا. قازاقپارات - وڭىرلەردى دامىتۋدىڭ 2020 - جىلعا دەيىنگى باعدارلاماسى كۇشىنە ەنگەندىكتەن، «قولجەتىمدى باسپانا-2020» باعدارلاماسى ءوز كۇشىن جويدى، دەپ حابارلاندى «قازاقستاننىڭ تۇرعىن ءۇي قۇرىلىس جيناق بانكى» ا ق رەسمي پورتالىندا.

«قۇرمەتتى سالىمشىلار، 2015 -جىلعى 1 قاڭتاردان باستاپ قازاقستان رەسپۋبليكاسى ۇكىمەتىنىڭ 2014 - جىلعى 28 - ماۋسىمداعى №728 - قاۋلىسىمەن بەكىتىلگەن وڭىرلەردى دامىتۋدىڭ 2020 - جىلعا دەيىنگى باعدارلاماسى كۇشىنە ەندى، ونىڭ قابىلدانۋىنا بايلانىستى «قولجەتىمدى باسپانا-2020» باعدارلاماسىنىڭ كۇشى جويىلدى»، - دەلىنگەن حابارلامادا.

ەسكە سالا كەتەيىك، 2020 - جىلعا دەيىن وڭىرلەردى دامىتۋ باعدارلاماسى «وڭىرلەردى دامىتۋ»، «2012-2020 - جىلدارعا ارنالعان مونوقالالاردى دامىتۋ»، «2011-2020 - جىلدارعا ارنالعان تۇرعىن ءۇي-كوممۋنالدىق شارۋاشىلىعىن جاڭعىرتۋ»، 2011-2020 - جىلدارعا ارنالعان «اق بۇلاق»، «قولجەتىمدى باسپانا-2020» باعدارلامالارىنىڭ بىرىكتىرىلۋى نەگىزىندە جاسالعان.

وسىعان دەيىن قازاقستان پرەزيدەنتى حالىققا ارنالعان «نۇرلى جول - بولاشاققا باستار جول» جولداۋىندا 2015 - جىلى باسپانا تۇرعىندارعا تومەنگى ستاۆكالارمەن بەرىلەتىنىن جانە ارەندالىق ۇيلەردى ءارى قاراي ساتىپ الۋعا بولاتىنىن ايتقان ەدى.

«قازىرگى كەزدە قولدانىستاعى جۇيە قوماقتى قارجىنى، باستاپقى جارنانى تولەۋدى تالاپ ەتەدى، سودان كەيىن بانكتەر كابالدى (كىرىپتارلىق) پايىزداردى بەكىتەدى، ياعني ونىڭ دەڭگەيى 20 پايىزعا جەتەدى. ادامدار ونى تولەۋگە قاۋقارسىز، وسىدان پروبلەمالار تۋىندايدى. بۇل باعدارلامالار قالادى، ولار داۋلەتتى ادامدار ءۇشىن جارامدى.

ال جاڭا باعىتتاعى باعدارلامانى جاس وتباسىلار ءۇشىن جانە باسپاناعا ءزارۋ ازاماتتارعا جاساپ جاتىرمىز. جاڭا باعدارلاما بويىنشا باسپانا ەش دەلدالدارسىز، بارىنشا تومەن پايىزبەن بەرىلەدى. نەسيەلىك قىزمەت 1-2 پايىز كولەمىندە بولۋى مۇمكىن»، - دەپ اتاپ ءوتتى ن. نازاربايەۆ.