قازاقستاندا 2020 - جىلعا قاراي 7 مىڭ شاقىرىم جول اقىلى بولادى - مينيسترلىك
دەپ حابارلايدى قازاقپارات ح ا ا ءتىلشىسى.
ق ر ۇلتتىق ەكونوميكا مينيسترلىگى سالالىق ەكونوميكا دەپارتامەنتىنىڭ ديرەكتورى ەرجان قازانبايەۆ جول قۇرىلىسى جانە جوندەۋ جۇمىستارىن جۇزەگە اسىرۋ بارىسى جونىندە ايتىپ بەردى.
ءمينيستردىڭ مالىمدەۋىنشە، نەگىزگى اۆتوكولىك جوبالارىن جۇزەگە اسىرۋ ءۇشىن «شۇعىلا» قاعيداتى بويىنشا 2 جىل ىشىندە 616 ميلليارد تەڭگە ءبولىندى. اتالعان قاراجاتتىڭ ەسەبىنەن رەسپۋبليكا بويىنشا 2 مىڭ شاقىرىم جول قۇرىلىسى جانە جوندەۋ جۇمىستارىمەن قامتىلعان، ونىڭ ىشىندە 1,3 مىڭ شاقىرىمنان استام اۆتوكولىك جولى ىسكە قوسىلعان.
«اتالعان باعىتقا بيىل بيۋدجەتتەن 356 ميلليارد تەڭگە قاراستىرىلىپ وتىر. 4,4 مىڭ شاقىرىم اۆتوكولىك جولىنا قۇرىلىس، جوندەۋ جۇمىستارىن جۇرگىزۋ جانە 600 شاقىرىم جولدى پايدالانۋعا بەرۋ جوسپارلانىپ وتىر»، - دەدى قازانبايەۆ.
سونداي- اق، ق ر ۇلتتىق ەكونوميكا مينيسترلىگى دەپارتامەنتىنىڭ باسشىسى ءۇشارال- دوستىق اۆتوجولىنا جۇرگىزىلەتىن كۇردەلى جوندەۋ جۇمىستارى جونىندەگى جۋرناليستەر قويعان ساۋالدارعا جاۋاپ بەردى.
«ءۇشارال- دوستىق اۆتوجولىنىڭ كۇردەلى جوندەۋ جۇمىستارىنا بيىلعى بيۋدجەتتە قارجى قاراستىرىلعان. مەردىگەرى دە انىقتالدى. ەندى تامىز- قىركۇيەك ايىندا جوندەۋ جۇمىستارى باستالادى»، - دەدى ە. قازانبايەۆ.
ءوز كەزەگىندە، ق ر ينۆەستيتسيالار جانە دامۋ مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى امانگەلدى بەكوۆ قازاقستاندىق جولدارعا اقىلى تولەم جۇيەسىن ەنگىزۋ بارىسى جونىندە باياندادى.
«نۇرلى جول» باعدارلاماسىندا 7 مىڭ شاقىرىم جولعا تولەم جۇيەسىن ەنگىزۋ قاراستىرىلعان. ازىرگە مۇنداي جۇيە 220 شاقىرىمعا سوزىلاتىن استانا- شۋچە جولىندا عانا بار. 2013 -جىلدان بۇگىنگە دەيىن بۇل جولدان شامامەن 4 ميلليارد تەڭگە جينالعان جانە بۇل قاراجات تولىعىمەن اتالعان جولدىڭ كۇتىمىنە جۇمسالادى»، - دەدى ول.
بەكوۆتىڭ ايتۋىنشا، بيىل 450 شاقىرىمعا سوزىلاتىن استانا- تەمىرتاۋ، الماتى- قاپشاعاي جانە الماتى- قورعاس اۋماقتارىنا تولەم جيناۋ جۇيەسىن ورناتۋ جۇمىستارى باستالادى.
«جىل سوڭىنا قاراي اتالعان جۇيەلەر اۆتونومدى رەجيمدە جۇمىس ىستەيدى جانە كەلەسى جىلدان باستاپ، بۇل جولدار اقىلى بولادى. سونداي- اق، بيىل 5 مىڭ شاقىرىم جولدىڭ جوبالىق- سمەتالىق قۇجاتتاماسىن ازىرلەيمىز، تولەم جيناۋ جۇيەلەرىن ورناتۋ جۇمىستارى 2018-2019 -جىلدارى اتقارىلادى. جالپى العاندا، 2020 -جىلعا قاراي، 7 مىڭ شاقىرىم جول اقىلى تۇرگە اۋىسادى جانە جىل سايىن شامامەن 30 ميلليارد تەڭگە جينالۋى مۇمكىن»، - دەدى بەكوۆ.
اۆتور: ايجان سەرىكجان قىزى