قاراعاندى وبلىسىنداعى گاز قۇبىرىنىڭ قۇرىلىسى 2019 - جىلى باستالادى
باسپاءسوز مالىمەتتەرىنە قاراعاندا، قاراعاندى ءوڭىرىنىڭ 120 ەلدى مەكەنى مەن التى ءىرى قالاسىن تابيعي گازبەن قامتۋ جوسپارلانۋدا.
قاراعاندى وبلىسى اكىمىنىڭ ورىنباسارى اناتولي شكارۋپانىڭ سوزىنشە، ناۋرىز ايىنىڭ باسىندا پرەزيدەنتتىڭ تاپسىرماسىنا قاتىستى جاڭا جۇمىس توبى ۇيىمداستىرىلعان. ونىڭ قۇرامىنا قاراعاندى وبلىسىنىڭ وكىلدەرى دە ەنگەن.
«سەبەبى «سارى ارقا» گاز قۇبىرىنىڭ نەگىزگى بولىگى، اتاپ ايتساق 820 شاقىرىمى ءبىزدىڭ ايماق تەرريتورياسى ارقىلى وتەدى. بۇگىنگى تاڭدا بەلسەندى فازادا جەر ۋچاسكەلەرىن گاز قۇبىرىنىڭ جۇيەلىك بولىگىنە بۇرۋ جانە جەرءۇستى قۇرىلىمدار استىنا جىبەرۋ بويىنشا جۇمىستار ءجۇرىپ جاتىر»، - دەدى اناتولي شكارۋپا.
ونىڭ ايتۋىنشا، قاراعاندى وبلىسىنىڭ اۋماعىندا ءۇش اۆتوماتتاندىرىلعان گاز تاراتۋ ستانساسىن قۇرۋ كوزدەلۋدە. ولار ۇيلەر مەن كاسىپورىندارعا گاز تاراتۋ كەزىندە گاز قىسىمىن ازايتۋ ءۇشىن قاجەت. جانە ولار جەزقازعان، تەمىرتاۋ جانە قاراعاندىدا پايدا بولادى.
ەنەرگەتيكا مينيسترلىگى مەن قازترانس گاز مالىمەتتەرى بويىنشا، بۇل نىساندارعا قاتىستى مەرزىم 2020- جىلدىڭ ورتاسىن قامتيدى.
«سول كەزدە ءبىز ءوزىمىزدىڭ گاز تاراتۋ جۇيەلەرىمىزدى ماگيسترالدى گاز قۇبىرىنا قوسا الامىز. 2019- جىلى ءبىز گاز تاراتۋ جۇيەلەرىنىڭ قۇرىلىسىن باستاۋىمىز كەرەك»، - دەيدى وبلىس اكىمىنىڭ ورىنباسارى.
اناتولي شكارۋپانىڭ سوزىنشە، ارى قاراي وبلىستىڭ ەلدى مەكەندەرىن ماگيسترالدى گاز قۇبىرىنا قوسۋ قارجىلىق مۇمكىندىكتەرگە قاتىستى بولماق.
«بارلىعىن بىردەن قوسۋ مۇمكىن ەمەس. ءبىزدىڭ جوبادا ءۇش گاز تاراتۋ جۇيەسى بار، ولارعا ەڭ جاقىن ورنالاسقان ەلدى مەكەندەر ءبىرىنشى بولىپ قوسىلادى»، - دەپ ءتۇسىندىردى اناتولي شكارۋپا.
گاز جەكە ۇيلەر مەن كوپقاباتتى تۇرعىن ۇيلەرگە بەرىلەدى دەپ جوسپارلانۋدا. سونىمەن قاتار گاز قۇبىرىنىڭ قۇرىلىسى ايماقتارداعى ەكولوگيالىق جاعدايدى تۇزەتەدى دەگەن ءۇمىت بار. گازداندىرۋ اتموسفەراعا تارالاتىن زياندى زاتتار مولشەرىن ازايتۋعا كومەكتەسەدى، جانە جانارماي رەتىندە ارزان تابيعي گازدى قولدانۋ ارقىلى كاسىپكەرلەرگە دە پايداسىن تيگىزەدى.
استانانى، قازاقستاننىڭ ورتالىق جانە سولتۇستىك ايماقتارىن گازبەن قامتيتىن «سارى ارقا» ماگيسترالدى گاز قۇبىرىن قۇرۋ ءتورت كەزەڭ بويىنشا جۇرگىزىلمەك.
ءبىرىنشى كەزەڭدە ۇزىندىعى 1081 شاقىرىمدى قۇرايتىن قىزىلوردا- جەزقازعان- قاراعاندى- استانا باعىتى بويىنشا ماگيسترالدى گاز قۇبىرىنىڭ قۇرىلىسى جوسپارلانعان. ەكىنشى كەزەڭدە استانا مەن كوكشەتاۋ ارالىعىندا، ءۇشىنشى كەزەڭدە پەتروپاۆلوۆسكىگە دەيىن گاز قۇبىرىن سالۋ كوزدەلگەن. سوڭعى ءتورتىنشى كەزەڭدە «جەزقازعان» جانە «تەمىرتاۋ» كومپرەسسورلىق ستانسالارىن قۇرۋ قاراستىرىلعان.