بۇل تۋرالى بۇگىن ورتالىق سايلاۋ كوميسسياسىنىڭ وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن و س ك مۇشەسى زاۋرەش بايمولدينا ايتتى، دەپ حابارلايدى قازاقپارات ءتىلشىسى.
«وزدەرىڭىز بىلەتىندەي، ساياسي پارتيالاردى تىركەۋدى ادىلەت مينيسترلىگى جۇرگىزەدى. ادىلەت مينيسترلىگىنىڭ بىزگە ۇسىنعان مالىمەتتەرىنە سايكەس، قازىرگى ۋاقىتتا 7 ساياسي پارتيا تىركەلگەن. ءبىراق، وسى جەردە 1,5 جىلعا جۋىق جۇمىس ىستەپ ءجۇرمىن، 7- ساياسي پارتيا بەلگىسىز. حات تا جونەلتتىك، ولاردان جاۋاپ كەلىپ جاتقان جوق. اتالعان پارتيانىڭ وكىلدەرىن شاقىرعان شارالاردىڭ بىردە-بىرىنە ەشكىم كەلمەدى»، - دەدى ول.
ز. بايمولدينانىڭ ايتۋىنشا، دوڭگەلەك ۇستەل، باسپا ءسوز ءماسليحاتى، بريفينگ، عىلىمي-تاجىريبەلىك كونفەرەنسيا سىندى بارلىق ءتۇرلى شارالارعا بەلسەنە قاتىساتىن 6 ساياسي پارتيا بار. ولار: «Nur Otan»، اق جول، قازاقستان كوممۋنيستىك حالىق پارتياسى، بىرلىك، اۋىل، جانە قازاقستاننىڭ جالپى ۇلتتىق سوتسيال-دەموكراتيالىق پارتياسى.
«قانشا رەسپۋبليكالىق قوعامدىق بىرلەستىك بار ەكەندىگى تۋرالى اقپاراتتى ەش ۋاقىتتا سۇراتپايمىز. بۇل ادىلەت ورگاندارىنىڭ قۇزىرەتىنە جاتادى. قازىرگى ۋاقىتتا ولار ەل پرەزيدەنتتىگىنە كانديدات ۇسىنا الاتىن بولعاندىقتان كەيىن عانا نازارىمىزدى اۋدارتىپ وتىر. ەگەر رەسپۋبليكالىق قوعامدىق ۇيىمدار كانديداتىن ۇسىناتىن بولسا، وندا ءبىز ولارمەن دە جۇمىس ىستەيمىز»، - دەدى ق ر و س ك مۇشەسى.