الماتىدا «قىران-2018» اتتى قۇسبەگىلەردىڭ رەسپۋبليكالىق تۋرنيرى وتەدى - فوتو

استانا. قازاقپارات - اقپاننىڭ 8 ى مەن 10 ى ارالىعىندا الماتى قالاسىنىڭ يپپودرومىندا ۇلتتىق سپورت تۇرىنەن «قىران-2018» اتتى قۇسبەگىلەردىڭ رەسپۋبليكالىق تۋرنيرى وتەدى، دەپ حابارلايدى قازاقپارات.

ايتۋلى دودانىڭ باستى ماقساتى وسىناۋ جاقسى ءۇردىستى ەلىمىزدىڭ مادەني، رۋحاني ورداسى - الماتى قالاسىندا قايتا جاڭعىرتىپ، قولعا الۋ ماقساتىندا، بيىلدان باستاپ قىران قۇس باپتاۋشىلاردىڭ جارىسىن وتكىزۋدى داستۇرگە اينالدىرۋ.

رەسپۋبليكالىق تۋرنيرگە اقمولا، اتىراۋ، شىعىس قازاقستان، قاراعاندى، وڭتۇستىك قازاقستان، جامبىل، الماتى وبلىستارى مەن استانا قالاسىنان 60 قا جۋىق قۇسبەگىلەر قاتىسادى.

جارىس ەكى كەزەڭنەن تۇرادى: قۇستىڭ سىنى، قۇسبەگىنىڭ كيىم ۇلگىسى، قۇستى ات ۇستىنەن قولعا شاقىرۋ، شىرعا تارتۋ (ءبىرىنشى كەزەڭ) اياقتالىپ، ىرىكتەلگەن بۇركىتتەر - فينالدىق كەزەڭدە قويانعا، تۇلكىگە سالىنسا، جارىستىڭ ەكىنشى كەزەڭىندە قارشىعا مەن يتەلگىلەر قولعا شاقىرىلادى، كوگەرشىنگە، قويانعا جىبەرىلەدى.