قازاقستاندا 2018-جىلدان باستاپ جەتىمدەر ءۇيى بولمايدى
ورتالىقتار اتا-انانىڭ قامقورلىعىنسىز قالعان بالالار كەلەشەك وتباسىن تاپقانعا دەيىن پانالايتىن ۋاقىتشا ورىن رەتىندە قاراستىرىلماق.
«وتباسىلاردى قولداۋ ورتالىقتارىندا بالالار جانۇياعا قايتا ورالعانعا دەيىن بولادى. وندا بالالار ءۇيىنىڭ تاربيەلەنۋشىلەرى بولمايدى. بالالار تەك بەلگىلى ءبىر ۋاقىتقا، ولاردىڭ قۇجاتتارى راسىمدەلىپ بىتكەنشە، اسىراپ الۋشىلار قۇجاتتارىن رەتتەپ جاتقانعا دەيىن قالادى»، - دەدى ق ر ءبىلىم جانە عىلىم مينيسترلىگى بالالار قۇقىعىن قورعاۋ كوميتەتىنىڭ ءتوراعاسى ەرجان ەرسايىنوۆ بالالار ۇيلەرىن ترانسفورماتسيالاۋعا ارنالعان جيىندا.
«ورتالىقتار ارقىلى بالا اسىراپ الۋعا قۇلىقتى اتا-انالارمەن پسيحولوگيالىق دايىندىق ساباقتارى، سونىمەن قاتار جەتىم بالالاردى قازاقستاندىق وتباسىلارعا ورنالاستىرۋ جۇمىستارى جۇرگىزىلەدى. بىزدە بالانى قايتادان بالالار ۇيىنە تاپسىرۋ وقيعالارى ءجيى كەزدەسەدى. بۇنىڭ بارلىعى پسيحولوگيالىق دايىندىقتىڭ جوقتىعىنان»، - دەپ اتاپ ءوتتى ول.
كوميتەت مالىمەتتەرى بويىنشا، بالانى قايتا تاپسىرۋ وقيعالارىنىڭ ۇلەسى 16 پايىزدى قۇرايدى. جالپى بالالار ۇيلەرىندەگى جەتكىنشەكتەر سانى جىل سايىن 1 مىڭعا ازايىپ كەلەدى. جاڭا وتباسىن تاۋىپ جاتقان بالالاردىڭ سانى ارتۋدا. بىلتىر استانا مەن الماتى قالالارىندا سىناق رەتىندە اشىلعان وتباسىن قولداۋ ورتالىقتارى ءوز ناتيجەسىن بەرە باستاعان. قازىر ەندى وسى ورتالىقتاردى وزگە دە بالالار ۇيلەرىندە اشۋدى كوزدەپ وتىرمىز. ءبىز ونىڭ زاڭنامالىق جاعىن رەتتەۋ بويىنشا جۇمىستى باستادىق. كەلەسى جىلدان باستاپ بۇل تاجىريبەنى رەسپۋبليكا بويىنشا ەنگىزەمىز. وسىنداي ورتالىقتار اشىلسا، قازاقستاندا جەتىمدەر ءۇيى بولمايدى»، - دەدى ە. ەرسايىنوۆ.
اۆتور: جاسۇلان جولدىبايەۆ