وليمپيادا-2018: ەكاتەرينا ايدوۆا 21-ورىنعا يە بولدى
08:35, 19 - اقپان 2018
پحەنچحان. قازاقپارات - وڭتۇستىك كورەيانىڭ پحەنچحان قالاسىندا ءوتىپ جاتقان 23- قىسقى وليمپيادا ويىندارىندا كونكي سپورتىنان سىنعا تۇسكەن وتانداسىمىز ەكاتەرينا ايدوۆا جارىستى 21- ورىنمەن اياقتادى، دەپ حابارلايدى قازاقپارات ءتىلشىسى.
ول كەشە كەشتە ايەلدەر اراسىندا وتكەن 500 مەتر قاشىقتىقتا باق سىنادى. وتانداسىمىز اتالعان قاشىقتىقتى 38,96 سەكۋندتا جۇگىرىپ ءوتتى.
بۇل سىندا باس جۇلدەنى جاپونيالىق ناو كودارا، كۇمىستى وڭتۇستىك كورەيا سپورتشىسى سانگ حۆا لي (+0,39) جانە قولا مەدالدى چەحيادان كەلگەن سپورتشى كارولينا ەربانوۆا (+0,40) جەڭىپ الدى.
ەستەرىڭىزگە سالا كەتەيىك، كەشە شاڭعىدان ەرلەر اراسىنداعى ەستافەتالىق جارىستا قازاقستاننان الەكسەي پولتورانين، ۆيتالي پۋحكالو، ەۆگەني ۆەليچكو جانە دەنيس ۆولوتكا سىنعا ءتۇسىپ، ناتيجەسىندە 8-ورىنعا يە بولدى. سونداي-اق، تاۋ شاڭعىشى يگور زاكۋردايەۆ الىپ سلالومنان سايىسقا ءتۇسىپ، جارىستى 51- ورىندا اياقتادى.