ەكسپو 2017 قالاشىعى سەرۋەن قۇراتىن قوعامدىق ورىنعا اينالادى

استانا. قازاقپارات - ەلورداداعى EXPO قالاشىعىندا تۋريستىك ايماق اشىلدى، دەپ حابارلايدى حابار24.kz.

تەلەارنا پورتالىنىڭ حابارلاۋىنشا، اۋماعى ات شاپتىرىم ورتالىقتا ساياحاتشىلار ءۇشىن قىسى- جازى قىزمەت كورسەتىلەتىن بىرەگەي نىساندار ىسكە قوسىلدى. ال جاڭا جىل قارساڭىندا مۇز قالاشىعى بوي كوتەرىپ، ەلىمىزدىڭ باستى شىرشاسى جاعىلادى.

 كورمە الاڭى اشىلعان العاشقى ساعاتتىڭ ىشىندە «نۇر الەم» سفەراسىن 2 مىڭعا جۋىق ادام ارالاپ ۇلگەردى. ويتكەنى ۇيىمداستىرۋشىلار ۇلتتىق پاۆيلوننىڭ تاقىرىپتىق ءمان- مازمۇنىن بايىتىپ، ءبىرقاتار جاڭاشىلدىق ەنگىزگەن.

 «كەلۋشىلەر «نۇر الەم» قوسىمشاسىن جۇكتەپ، پاۆيلونداعى ءاربىر ينستاللياتسيانى ۇيالى تەلەفونى ارقىلى تاماشالاي الادى. ول ءۇشىن سفەرانىڭ ءار قاباتىندا QR- كودتار جازىلعان. سول ارقىلى قوسىمشا كورمە جوبالارىن شىنايى تۇردە كورسەتەدى»، - «استانا ەكسپو-2017» ۇ ك دەپارتامەنتىنىڭ ديرەكتورى مارات وماروۆ.