قازاقستان بارىسى-2017 : اعايىندى ۇلان مەن رۋسلان بەلدەسىپ، جەڭىستى اعاسىنا سىيلادى

استانا. قازاقپارات - استانادا ءوتىپ جاتقان قازاق كۇرەسىنەن "قازاقستان بارىسى" تۋرنيرىنىڭ شيرەك فينالىندا اعايىندى ۇلان رىسقۇل مەن رۋسلان ءابدىرازاقوۆتىڭ جولى ءتۇيىسىپ، ناتيجەسىندە اعاسى ۇلان رىسقۇل جەڭىسكە جەتتى، دەپ حابارلايدى قازاقپارات ءتىلشىسى. وسىلايشا جارتىلاي فينالعا ۇلان رىسقۇل، ايبەك نۇعىماروۆ، ارمان قاليەۆ جانە ەلامان ەرعاليەۆ شىقتى.

ەستەرىڭىزگە سالا كەتەيىك، بيىل ەكسپو-2017 اياسىندا ۇيىمداستىرىلىپ جاتقان دوداعا ەلىمىزدىڭ 14 وبلىسى مەن استانا جانە الماتى قالالارىنان ىرىكتەلگەن ەڭ مىقتى 34 بالۋان قاتىسىپ جاتىر. جارىستىڭ جۇلدە قورى - 50 ميلليون تەڭگە. ايتالىق، بالۋاندار ءار بەلدەسۋدەگى جەڭىس ءۇشىن - 100000 تەڭگە كولەمىندە سىياقى الىپ وتىرسا، جارىس سوڭىندا باس جۇلدەنى جەڭىپ العان بالۋان 25 ميلليون تەڭگەنى قالتاسىنا باسادى، ال باپكەرى 3,5 ميلليون تەڭگە سىياقى الادى. ەكىنشى ورىنعا يە بولعان بالۋان 5,5 ميلليون تەڭگەمەن ماراپاتتالسا، باپكەرى 1,8 ميلليون تەڭگەگە يە بولادى.

ۇزدىك ۇشتىكتى تۇيىندەگەن بالۋاننىڭ قالتاسى 1,8 ميلليون تەڭگەگە تولىقسا، باپكەرى 900 مىڭ تەڭگەنى قانجىعاسىنا بايلايدى. بۇل تۋرنيردە بالۋاندار عانا ەمەس، كورەرمەندەر مەن جانكۇيەرلەر دە سىيلىقسىز قالمايدى. «قازاقستان بارىسىنىڭ» فينالدىق باسەكەسىنە كىرۋ بيلەتتەرى بويىنشا «Renault Logan» ماركالى اۆتوكولىگى ويناتىلادى.

اۆتور: كۇنسۇلتان وتارباي