شىمكەنتتەن «استانا ەكسپو-2017» موتوكەرۋەنى جولعا شىقتى
بايكەرلەر ەلوردا تورىندەگى حالىقارالىق مامانداندىرىلعان كورمەنى قولداۋ ماقساتىندا استاناعا بارادى.
ولاردى قالا تۇرعىندارى سالتاناتتى تۇردە شىعارىپ سالدى، دەپ حابارلايدى قازاقپارات ح ا ا ءتىلشىسى.
«ەكسپو-2017» حالىقارالىق كورمەسىنىڭ جوعارى دەڭگەيدە وتۋىنە ءۇن قوسپاق نيەتتە شىمكەنت قالاسىنان 10 كاسىبي بايكەر ساپارعا شىقتى. ولاردىڭ قاتارىنا گوللانديا مەن فرانسيادان كەلگەن ەكى بايكەر دە قوسىلىپتى.
شەرۋدى وبلىستىق موتوتسيكلشىلەر فەدەراتسياسى ۇيىمداستىرعان. ساپارىن «اباي» ساياباعىنان باستاعان كەرۋەن شىمكەنت قالاسىنىڭ بىرنەشە كوشەسىن ارالاپ شىقتى.
ولاردى شىعارىپ سالۋ جيىنىندا قازاقستان حالقى اسسامبلەياسىنىڭ و ق و بويىنشا فيليالى وزبەك جانە سلاۆيان مادەني ورتالىقتارىنىڭ ونەرپازدارى ءان شىرقاپ، ءبي بيلەدى. سونداي-اق ەكسپو-2017 كورمەسىنە وڭىردەن باراتىن ەرىكتى ستۋدەنتتەر دە بايكەرلەرگە قولداۋ كورسەتىپ، جيىندى كوڭىلدى ەتە ءتۇستى.
موتوكەرۋەن جەتەكشىسى رۇستەم بازاربەكوۆكە ەلىمىزدىڭ كوك تۋى سالتاناتتى تۇردە تابىستالدى. سونىمەن قاتار، كەرۋەنگە قاتىسۋشى بايكەرلەرگە ەكسپو - 2017 كورمەسىنىڭ ءتولتاڭباسى مەن تۋريستىك-اقپاراتتىق ورتالىعىنىڭ اتى جازىلعان تۋلار بەرىلدى.
«موتوتسيكلشىلەردى ەكى اي دايىندادىق. ازىرگە شىمكەنتتەن ون موتوتسيكلشى شىقتىق. ءبارى - كاسىبي بايكەرلەر. موتوتسيكل ايداۋمەن بەس جىلدان بەرى اينالىسىپ كەلەدى. ولاردىڭ سانى وسىمەن عانا شەكتەلمەيدى، وزبەكستاننان، قىرعىزستاننان دا بايكەرلەر قاتارىمىزعا قوسىلادى»، - دەيدى وبلىستىق موتوتسيكلشىلەر فەدەراتسياسىنىڭ ءتوراعاسى رۇستەم بازاربەكوۆ.
بۇل موتوشەرۋ ەلىمىزدىڭ 9 وبلىسى مەن 1 قالاسىن قامتيدى. اتاپ ايتساق، و ق و، س ق و، قىزىلوردا، جامبىل، قاراعاندى، اقمولا، اقتوبە، قوستاناي، ب ق و وبلىستارى مەن استانا قالاسىنا دەيىن جالعاسادى. ەڭ الدىمەن تۇركىستان قالاسىنا قاراي بەت العان بايكەرلەر كەيىن قىزىلوردا، اقتوبە قالالارىنا جەتىپ، جەتى مىڭ شاقىرىم جول جۇرمەكشى. استانا قالاسىنا تابان تىرەپ، كورمەنىڭ اشىلۋ سالتاناتىنا قاتىسادى دەپ كۇتىلۋدە.
اۆتور: اينۇر اقبايەۆا