كوكشەتاۋدا ەكسپو-2017 كورمەسىنە ورايلاستىرىلعان ءدۇبىرلى بايگە ءوتتى
08:54, 23 - مامىر 2017
كوكشەتاۋ. قازاقپارات - كوكشەتاۋدا «ەكسپو-2017» حالىقارالىق كورمەسىنە ورايلاستىرىلعان ءدۇبىرلى بايگە وتكىزىلدى، دەپ حابارلايدى «قازاقپارات» ح ا ا ءتىلشىسى.
كوكشەتاۋدىڭ ىرگەسىندەگى كراسنويار سەلوسىنداعى «قۇلاگەر» اتشابارىندا ۇيىمداستىرىلعان بايگەگە بارلىعى التى قاشىقتىق بويىنشا 54 جۇيرىك قاتىستىرىلىپ، باعى مەن بابى سىنالدى.
ات بايگەسىندە كوكشەتاۋدىڭ ابىرويىن اسپانداتقان ارتەم ەلەنبەرگ ەسىمدى شاباندوز ءبىرىنشى ورىنعا يە بولدى.
ال 10 شاقىرىمدىق توق بايگەدە استانا قالاسىنىڭ شاباندوزى الىشەر رۇستەموۆ تىزگىندەگەن جۇيرىك مارە سىزىعىنان ءبىرىنشى بولىپ ءوتتى.
قۇنان بايگەدە استانالىق ەۆگەني چيبيسوۆ جەڭىمپاز اتانسا، جورعا جارىستا دا استانا قالاسىنان كەلگەن ەسلام ۋاحيتوۆ ەسىمدى شاباندوزدىڭ «گامبيت ور» دەيتىن تۇلپارى توپ جاردى.
جۇلدەلى ورىنداردان كورىنگەن سپورتشىلار اقشالاي سىيلىقتارمەن ماراپاتتالدى.