ەكسپو-2017 كورمەسى اياسىندا وتەتىن كونگرەسكە نوبەل سىيلىعىنىڭ لاۋرەتتارى كەلەدى
بۇل تۋرالى بۇگىن الماتىدا كونگرەسكە دايىندىق بارىسىن پىسىقتاۋعا ارنالعان دوڭگەلەك ۇستەل بارىسىندا حالىقارالىق جيىننىڭ باس ۇيلەستىرۋشىسى، ۇلتتىق ينجەنەرلىك اكادەميانىڭ عىلىمي حاتشىسى گۇلبازار مەديەۆا ايتتى، دەپ حابارلايدى قازاقپارات ءتىلشىسى.
«بولاشاقتىڭ ەنەرگياسى: يننوۆاتسيالىق سەناريلەر جانە ولاردى جۇزەگە اسىرۋ ادىستەرى» تاقىرىبىندا ينجەنەرلەر مەن عالىمداردىڭ دۇنيەجۇزىلىك كونگرەسى (WSEC-2017) 19-20- ماۋسىم ارالىعىندا استانا قالاسىندا ەكسپو-2017 كورمەسى اياسىندا وتپەك. دوڭگەلەك ۇستەلدى باستى بايانداما جاساعان گ. مەديەۆا مۇنداي شارا الەم تاجىريبەسىندە تۇڭعىش رەت ۇيىمداستىرىلعالى وتىرعانىن ايتتى.
«كونگرەستىڭ تاقىرىبىن ەكى جىل بويى تالقىلادىق. سەبەبى، قازاقستان عالىمدارى عانا ەمەس، ەنەرگەتيكا سالاسىنداعى حالىقارالىق ۇيىمدارمەن كەڭەستىك. كونگرەسس اياسىندا 15 شارا ۇيىمداستىرىلادى. مۇنداي شارا ءبىرىنشى رەت ۇيىمداستىرىلعالى وتىر. سەبەبى، بۇعان دەيىن عالىمدار عىلىمي ەڭبەكتەرىن عانا ۇسىنسا، بۇل جولى ينجەنەرلەر دە ءوز قوندىرعىلارىن كورسەتە الادى. وندا قازاقستان اتىنان ۇلتتىق ينجەنەرلىك اكادەميانىڭ اكادەميكتەرى بولوتوۆتىڭ تۋربينالارى مەن اكادەميك ناديروۆتىڭ «تورنادو» قوندىرعىلارىن كورسەتە الامىز. سونىمەن قاتار، كۇن مەن جەلدىڭ قۋاتىن جيناي الاتىن قوندىرعىلاردى تانىستىراتىن بولامىز»، - دەدى گۇلبازار مەديەۆا.
گ. مەديەۆا كونگرەسكە الەمدەگى بەدەلدى نوبەل سىيلىعىنىڭ لاۋرەاتتارى تانىمال عالىمدار كەلگەلى جاتقانىن جەتكىزدى.
«حيميا سالاسى بويىنشا نوبەل سىيلىعىنىڭ يەگەرى، گەرمانيالىق عالىم شتەفان حەلل جانە فيزيكا ماماندىعى بويىنشا نوبەل سىيلىعىنىڭ يەگەرى، امەريكالىق دانكان حولدەين قاتىسادى. سونىمەن قاتار، كاتار ەلىنىڭ تاۋەلسىز ەنەرگەتيكالىق كومپانياسى مەن حالىقارالىق IRENA عىلىمي ورتالىعىنىڭ ۇيىمداستىرۋىمەن ارنايى كونفەرەنسيالار وتەدى. بۇگىنگى تاڭدا الەمنىڭ 50 ەلىنەن 200 دەن استام تانىمال عالىمدار مەن ماماندار كونرگەسكە قاتىساتىنىن راستادى. ولاردىڭ اراسىندا، «عالامدىق ەنەرگيا» حالىقارالىق سىيلىعىنىڭ لاۋرەاتتارى، ءبىرقاتار ەلدىڭ مينيسترلەرى مەن عىلىمي-ينجەنەرلىك بىرلەستىكتەردىڭ باسشىلارى بار»، - دەدى گ. مەديەۆا.
ايتا كەتەيىك، حالىقارالىق باعدارلامالىق كوميتەتىنە نۇرتاي ابىقايەۆ ءتوراعالىق ەتەتىن WSEC-2017 جيىنى ەكسپو-2017 اياسىندا الەمنىڭ جەتەكشى عالىمدارى مەن ينجەنەرلەرىنىڭ باسىن قوساتىن ماڭىزدى ءىس-شارانىڭ ءبىرى بولماق.