ەكسپو-2017: ۇلى بريتانيا پاۆيلونى قازاقتىڭ كيىز ءۇيى ۇلگىسىندە بولادى - فوتو
شاراعا وسى ەلدەگى قازاقستاننىڭ ەلشىسى ەرلان ىدىرىسوۆ قاتىستى، حابارلايدى قازاقپارات ءتىلشىسى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
بريتاندىق پاۆيلوننىڭ تاقىرىبى - «ءبىز - ەنەرگيامىز». پاۆيلوننىڭ جالپى اۋماعى 1,100 شارشى مەتردى قۇرايدى. ول كورمەدەگى ەڭ ءىرى نىسانداردىڭ ءبىرى بولادى. پاۆيلون قازاقتىڭ كيىز ءۇيى پىشىندەس بولماق. وعان كىرگەن ادامدار ۇلى بريتانيانىڭ تاريحى مەن جەتىستىكتەرىمەن تانىسا الادى. ال بولاشاق ەنەرگيانى ءوندىرۋ جانە قولدانۋ سالاسىندا «گرافەن» اتتى بىرەگەي ماتەريالدى تانىستىرۋ شارالارىنا نەگىزگى باسىمدىق بەرىلەدى. ۇلى بريتانيا پاۆيلونىن ماۋسىمنىڭ 26- كۇنى - كورولدىكتىڭ ۇلتتىق كۇنى اياسىندا اشۋ جوسپارلانىپ وتىر.
«ەكسپو-2017» ءبىزدىڭ ەلىمىز ءۇشىن تاريحتاعى اسا ماڭىزدى جاھاندىق فورۋمداردىڭ ءبىرى بولادى. كورمە اياسىندا شاڭحاي ىنتىماقتاستىق ۇيىمىنىڭ جانە يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى سامميتتەرىن، كورمەگە قاتىسۋشى ەلدەردىڭ ۇلتتىق كۇندەرىن، ءتۇرلى مينيسترلىك فورۋمدارىن، بارلىعى ءۇش مىڭنان استام مادەني جانە سپورتتىق ءىس- شارالار وتكىزۋ جوسپارلانىپ وتىر»، - دەدى قازاقستاننىڭ توتەنشە جانە وكىلەتتى ەلشىسى ەرلان ىدىرىسوۆ.
ءوز كەزەگىندە ساۋدا جانە ينۆەستيتسيالار مەملەكەتتىك ءمينيسترى، قازاقستان- ۇلى بريتانيا ۇكىمەتارالىق كوميسسيانىڭ تەڭ ءتوراعاسى گ. حەندس ەكى ەل اراسىنداعى قاتىناستاردىڭ جوعارى دەڭگەيدە دامىپ كەلە جاتقاندىعىنا باسا نازار اۋدارىپ، ءىس- شاراعا قاتىسۋشىلاردى وسى جىلعى 13-16- ساۋىردە لوندون الاڭدارىنىڭ بىرىندە وتەتىن قازاقستاننىڭ «كەرۋەن- ەكسپو-2017» روۋدشوۋىنا قاتىسۋعا شاقىردى.
حەندس مىرزا «استانا ەكسپو-2017» بريتانياعا ونىڭ سوڭعى تەحنولوگيالىق جانە يننوۆاتسيالىق جاڭالىقتارىن بارشا الەمگە كورسەتەتۋگە مۇمكىندىك بەرەتىنىن اتاپ ءوتتى. «ەكسپو-2017» كورمەسىنە ۇلى بريتانيا اتىنان لوندون سيتيدىڭ لورد- مەرى ەندريۋ پارملي جانە كورولدىكتىڭ ساۋدا جانە ينۆەستيتسيالار مەملەكەتتىك ءمينيسترى گ. حەندس قاتىساتىن بولادى.
اۆتور: ارمان اسقاروۆ