قازاق كۇرەسىنەن «قازاقستان بارىسىنىڭ» 2017-جىلعى ىرىكتەۋ سىندارى باستالادى
بۇل تۋرالى بۇگىن استانا قالاسىندا ءوتىپ جاتقان «قازاقستان بارىسى» قازاق كۇرەسىن دامىتۋ قورىنىڭ باسپا ءسوز ماسليحاتىندا بەلگىلى بولدى.
قازاقستان رەسپۋبليكاسى تۇڭعىش پرەزيدەنتىنىڭ جۇلدەسى ءۇشىن ءداستۇرلى تۇردە ءوتىپ كەلە جاتقان تۋرنير بيىل دا استانا كۇنىنە وراي، 2- شىلدەگە جوسپارلانعان.
1- ءساۋىر كۇنى اۋىلدىق جەرلەردە باستالاتىن ىرىكتەۋ جارىستارى كەيىن، اۋداندىق، وبلىستىق دەڭگەيدە جالعاسادى. كەزەكتى VII تۋرنيردىڭ جەڭىمپازدارى 2- شىلدە كۇنى ەلوردادا انىقتالادى.
ايتا كەتەيىك، بيىل «قازاقستان بارىسىنىڭ» اقتىق سىنى 2016-جىلى ىسكە قوسىلعان «بارىس ارەنا» سپورت سارايىندا وتەدى. وعان 12 مىڭعا جۋىق جانكۇيەر كەلەتىنى كۇتىلۋدە. العاشقى جىلى «داۋلەت» سپورت كەشەنىندە (3000 ادام) وتكەن بەلدى باسەكە كەيىنگى بەس جىل بويى «سارى ارقا» رەسپۋبليكالىق ۆەلوترەگىندە (10000 ادام) ۇيىمداستىرىلىپ كەلدى.
2012-جىلدان بەرى قازاق كۇرەسىنەن رەسپۋبليكالىق تۋرنيردى رەسەيدىڭ «بوەتس»، تۇركيانىڭ «TRT Avaz» جانە «قازاقستان» ۇلتتىق تەلەارناسى كورسەتۋدە. ال بيىل اتالعان تەلەارنالارعا رەسەيدىڭ بەدەلدى «ماتچ ت ۆ» ارناسى قوسىلدى، دەپ اتاپ ءوتتى «قازاقستان بارىسى» جوباسىنىڭ اۆتورى ارمان شورايەۆ.
«ۇيىمداستىرۋ توبىنىڭ باستى ماقساتى قازاق كۇرەسىن ناسيحاتتاۋ، ۇلتتىق سپورتتى بارىنشا تانىمال ەتۋ. ءبىر كەزدەرى ۇمىت قالعان قازاق كۇرەسىن قايتا جاڭعىرتۋ جوباسى ءوز جەمىسىن بەرۋدە. ءتول كۇرەستى سەرىك ەتكەن بۇلدىرشىندەر سانى جىل سايىن مىڭ سپورتشىعا ارتىپ كەلەدى. بۇگىنگى كۇنى قازاق كۇرەسىمەن شۇعىلداناتىن سپورتشىلار سانى قازاقستان بويىنشا 103681 بالۋاندى قۇرايدى. «قازاقستان بارىسى» تۋرنيرىندە جەڭىمپاز جانە جۇلدەگەر اتانعان تۇيە بالۋاندار حالىقتىڭ زور ىقىلاسىنا بولەنىپ، تانىمال تۇلعالارعا اينالدى. سول ءۇشىن الداعى ۋاقىتتا قازاق كۇرەسىن شەتەلدە دە كەڭىنەن ناسيحاتتاۋدى ءجون ساناپ وتىرمىز»، - دەدى ول.
ەستەرىڭىزگە سالايىق، وسىعان دەيىن «قازاقستان بارىسى» اتاعىن 2011-جىلى - ۇلان رىسقۇل، 2012، 2015 جانە 2016-جىلدارى - بەيبىت ىستىبايەۆ، 2013-جىلى - ايبەك نۇعىماروۆ، 2014-جىلى - مۇحيت تۇرسىنوۆ جەڭىپ العان بولاتىن.
اۆتور: كۇنسۇلتان وتارباي