ازيادا-2017: قىتايدى قۋىپ جەتۋگە جاقىنداپ قالدىق

ساپپورو. قازاقپارات - بۇگىن ساپپورو قالاسىندا ءوتىپ جاتقان Ⅷ قىسقى ازيادا ويىندارى قازاق سپورتشىلارى ءۇشىن اسا تابىستى بولدى، دەپ حابارلايدى جاپونيادان قازاقپارات ءتىلشىسى.

بۇگىن قازاقستان قۇراماسى ءبىر كۇندە 2 التىن، 2 كۇمىس، 1 قولا جالپى 5 مەدال جەڭىپ الىپ، جۇلدە سانى بويىنشا ءۇشىنشى ورىنعا جاقىنداپ قالدى.

بەسىنشى جارىس كۇنى بياتلونشىلارىمىز گالينا ۆيشنيەۆسكايا مەن يان ساۆيتسكي التىن السا، ۆاسيلي پودكورىتوۆ پەن ەلەنا كولومينا كۇمىس، ال الينا رايكوۆا قولا مەدالعا قول جەتكىزدى.

ال وسىعان دەيىن جەرلەستەرىمىزدىڭ قورجىنىندا 1 التىن، 2 كۇمىس جانە 4 قولا مەدال بولعان. بۇگىن جالپى مەدالدار سانى 12-گە جەتتى. ونىڭ ۇشەۋى التىن، تورتەۋى كۇمىس، بەسەۋى قولا مەدال. وسى كورسەتكىشپەن قازاقستاندىق سپورتشىلار جالپى ەسەپتە ءتورتىنشى ورىندا كەلەدى.

سونداي- اق، بۇگىنگى حوككەيشى ارۋلارىمىزدىڭ دا ەرەن ەرلىگىن ايتا كەتۋىمىز كەرەك. ولار قارسىلاستارىنىڭ قاقپاسىنا جاۋاپسىز 19 شايبانى توعىتتى. سونىمەن بىرگە 17 جاسقا ەندى تولعان مانەرلەپ سىرعاناۋشى ارۋىمىز ەليزابەت تۇرسىنبايەۆا قىسقا باعدارلامادان سىنعا ءتۇسىپ، التىنشى ورىنعا تابان تىرەدى.

ال جالپى ەسەپتە جاپونيا قۇراماسى كوشباسشىلىقتى ەشكىمگە بەرمەي كەلەدى. ولاردىڭ ەنشىسىندە قازىرگى تاڭدا 45 جۇلدە (14 التىن، 15 كۇمىس، 16 قولا) بار. ەكىنشى ورىنداعى وڭتۇستىك كورەيا قۇراماسى كۇنشىعىس ەلىن وكشەلەپ قۋىپ كەلەدى. بۇلاردا جالپى مەدالدار سانى از بولعانىمەن التىن مەدالدار سانى جاعىنان تارازى باسى تەڭەسىپ تۇر. وڭتۇستىك كورەيالىقتاردىڭ ەنشىسىندە 35 جۇلدە (14 التىن، 12 كۇمىس، 9 قولا) بار.

 ءبىزدىڭ ەلدىڭ سپورتشىلارىنان ءبىر ساتى جوعارى تۇرعان قىتاي قۇراماسىندا 18 جۇلدە (6 التىن، 6 كۇمىس جانە 6 قولا) بار. قازاق سپورتشىلارى بۇگىنگى قارقىنىمەن مەدالدار سانىن ارتتىرا بەرسە، قىتايدى باسىپ وزۋعا مۇمكىندىك بار ...

اۆتور: كۇنسۇلتان وتارباي