يتاليانىڭ فريۋلي- ۆەنەتسيا- دجۋليا ءوڭىرى ەكسپو-2017 كورمەسىنە قاتىسۋعا قىزىعۋشىلىق تانىتتى
ۇلتتىق كومپانيا باسشىسى شەتەلدىك قوناقتاردى كورمەنى دايىنداۋ بارىسى جونىنەن حاباردار ەتتى. اتاپ ايتقاندا، ول كورمەگە قاتىسۋشى شەت ەلدەردىڭ وكىلدەرىنە العاشقى بەس پاۆيلون مەن تۇرعىن جايلاردىڭ تابىستالعاندىعى تۋرالى ايتتى.
ا. ەسىموۆ قوناقتارعا بۇگىندە ەكسپو-2017 كورمەسىن وتكىزۋ بويىنشا ۇلكەن دايىندىق جۇمىسى جۇرگىزىلىپ جاتقاندىعىن، نىسانداردىڭ قۇرىلىسى اياقتالۋدا ەكەندىگىن جانە كورمەنىڭ مازمۇندىق بولىگى ويلاستىرىلىپ، كورمەگە كەلۋشىلەردى تارتۋ بويىنشا بەلسەندى جۇمىس اتقارىلىپ جاتقاندىعىن حابارلادى.
«ەگەر سىزدەردىڭ وڭىرلەرىڭىزدەن كورمەگە كەلەتىن تۋريستەر بولىپ جاتسا، ءبىز وعان وتە قۋانامىز. يتاليامەن بىزدە مەملەكەتتىك جانە وڭىرلىك دەڭگەيدە وتە جاقسى ءوزارا قارىم-قاتىناس ورناتىلعان. ءبىز ميلانداعى ەكسپو-2017 كورمەسىنىڭ ۇيىمداستىرۋشىلىق كوميتەتىمەن تىعىز ىنتىماقتاستىقتا جۇمىس اتقاردىق جانە مەن دجۋزەپپە سالا مىرزامەن بىرنەشە مارتە كەزدەستىم. ءبىز سىزدەرمەن ودان ءارى ىنتىماقتاستىققا دايىنبىز»، - دەدى احمەتجان ەسىموۆ.
فريۋلي- ۆەنەتسيا-دجۋليا ءوڭىرىنىڭ پرەزيدەنتى دەبورا سەرراككياني ەكسپو-2017 كورمەسىندە تانىستىرۋ ءۇشىن وبلىستىڭ الەۋەتى تۋرالى اڭگىمەلەدى. ءوڭىر يتاليانىڭ 20 جەرلەرىنىڭ اراسىنداعى حالىقارالىق ىنتىماقتاستىق ءۇشىن ۇلكەن مۇمكىندىكتەرى بار اۆتونوميالىق بەستىككە ەنەدى. «ءبىز ەكسپو-2017 كورمەسىنىڭ ەنەرگەتيكا تۇرعىسىنان تولتىرىلىمى قانداي بولاتىندىعىن بىلۋگە جانە ءبىزدىڭ كورمەدە نە كورسەتەتىنىمىزدى شەشۋگە وتە قىزىعۋدامىز. ءبىزدىڭ وڭىردە جوعارى وقۋ ورىندارى مەن عىلىمي ينستيتۋتتار كوپ. ولار استانا قالاسىنداعى ەكسپو-2017 كورمەسىندە ءوز جەتىستىكتەرىن كورسەتە الار ەدى»، - دەپ اتاپ ءوتتى دەبورا سەرراككياني.
فريۋلي- ۆەنەتسيا- دجۋليا ءوزىنىڭ ۋدينا ۋنيۆەرسيتەتى بازاسىنداعى دامىعان عىلىمي-زەرتتەۋ كلاستەرىمەن، قالالاردى باسقارۋ ساندىق تەحنولوگيالارىمەن، مادەني داستۇرلەرىمەن، اگرارلىق ازىق-تۇلىك كەشەنىمەن، ماشينا جاساۋ سالاسىمەن، سونىمەن قاتار شاراپ ءوندىرىسى بويىنشا يننوۆاتسيالىق تەحنولوگيالارىمەن اتاقتى. بۇگىندە 105 ەل، 17 حالىقارالىق ۇيىم كورمەگە قاتىساتىندىقتارىن راستادى، 88 ءى قاتىسۋ كەلىسىم-شارتىنا قول قويىلدى.
يتاليا رەسپۋبليكاسى كورمەگە قاتىساتىندىقتارىن راستاعان، شارتقا قول قويعان جانە ۇلتتىق پاۆيلون كوميسسارىن تاعايىنداعان العاشقى ەلدەردىڭ ءبىرى بولدى.