چەحيا «ەكسپو-2017» حالىقارالىق كورمەسىنە قاتىساتىن بولدى
تاراپتار اڭگىمە بارىسىندا ەكى ەل اراسىندا ەكونوميكا، مەديتسينا، مادەنيەت جانە تۋريزم سالالارىن دامىتۋ مۇمكىندىگىنە نازار اۋدارىپ، ەكىجاقتى قارىم-قاتىناستى كەڭەيتۋدىڭ، پارلامەنتارالىق بايلانىستى نىعايتۋدىڭ ماڭىزدى ماسەلەلەرىن تالقىلادى.
ايماقتىق جانە حالىقارالىق تۇراقتىلىق پەن قاۋىپسىزدىك ماسەلەسى ءسوز ەتىلگەندە دەپۋتات قۋانىش سۇلتانوۆ وسى سالاداعى ەلباسىنىڭ ماڭىزدى قادامدارى مەن قازاقستاننىڭ قوسىپ جاتقان ۇلەسى تۋرالى اڭگىمەلەپ، كوپجاقتى ديپلوماتيا سالاسىنداعى ەلىمىزدىڭ بەلسەندى قىزمەتىنە دە توقتالدى. استانادا وتەتىن «ەكسپو-2017» حالىقارالىق كورمەسى دە نازاردان تىس قالمادى.
ءوز كەزەگىندە ەلشى چەحيا كاسىپكەرلەرىنىڭ اتالعان كورمەگە بەلسەنە قاتىساتىندىعىن مالىمدەدى. بۇدان بولەك، ەليشكو جيگوۆا قازاقستانعا دەگەن قۇرمەتىنىڭ ەرەكشە ەكەنىن، باۋىرمال، بەيبىت ەلدىڭ ورتاسىندا ناتيجەلى جۇمىس اتقارىپ، قوس مەملەكەتتىڭ ىنتىماقتاستىعىن ودان ءارى دامىتۋعا بارىنشا ىقپال ەتەتىنىن جەتكىزدى.
كەزدەسۋ بارىسىندا تاراپتار الەمدىك ساياسي جانە ەكونوميكالىق ماسەلەلەردى تالقىلاپ، قازاقستاندا وتەتىن پرەزيدەنتتىك سايلاۋعا قاتىستى پىكىرلەرىن ورتاعا سالدى.
ەلشى قازاقستاندىقتاردى كەلە جاتقان ۇلىستىڭ ۇلى كۇنى - ناۋرىز مەرەكەسىمەن دە قۇتتىقتاۋدى ەستەن شىعارعان جوق.
اۆتور: قانات مامەتقازى ۇلى