ەكسپو-2017 كورمەسىنە كەلۋشىلەرىنىڭ سانى 3 ميلليونعا جۋىقتادى

استانا. قازاقپارات - 10 -ماۋسىمنان 20 -تامىزعا دەيىنگى ارالىقتا ەكسپو-2017 حالىقارالىق مامانداندىرىلعان كورمەسىنە 2779820 ادام كەلدى، دەپ حابارلايدى «قازاقپارات» ح ا ا ءتىلشىسى «استانا ەكسپو-2017» ۇ ق» ا ق باسپا ءسوز قىزمەتىنە سىلتەمە جاساپ.

كورمەنىڭ ءۇش ميلليونىنشى كەلۋشىسى اپتا سوڭىندا انىقتالۋى مۇمكىن.

«14-20 -تامىز كۇندەرى ەكسپو حالىقارالىق مامانداندىرىلعان كورمەسىنە 345445 ادام، ياعني ورتاشا ەسەپپەن كۇنىنە 49349 ادام كەلدى. وتكەن اپتامەن سالىستىرعاندا كەلۋشىلەر سانى 14 مىڭ ادامعا وسكەن. وسىلايشا، 10 -ماۋسىمنان 20 -تامىزعا دەيىنگى ارالىقتا ەكسپو-2017 كورمەسىنە 2779820 ادام كەلدى»، - دەپ حابارلادى «استانا ەكسپو-2017» ۇ ق» ا ق باسپا ءسوز قىزمەتى.

10 -ماۋسىم - 20 -تامىز كۇندەرى كورمەنىڭ بارلىق نىساندارىنا كىرىپ شىعۋ كورسەتكىشى 22113663-تى قۇرادى، ونىڭ ىشىندە حالىقارالىق پاۆيلوندارعا - 19438248، كورمە نىساندارىنا - 2675415 ادام بارعان.

ايتا كەتەيىك، بۇعان دەيىن حالىقارالىق مامانداندىرىلعان ەكسپو-2017 كورمەسىنە كەلۋشىلەر سانى 2 ميلليون، ال كىرىپ شىعۋ كورسەتكىشى شامامەن 5 ميلليون بولادى دەپ بولجانعان ەدى.

4 -تامىز كۇنى ورال قالاسىنىڭ تۇرعىنى عايسا جۇماليەۆ «ەكسپو-2017» كورمەسىنىڭ ەكى ميلليونىنشى كەلۋشىسى اتاندى. ۇلتتىق كومپانيا باسشىسى احمەتجان ەسىموۆ كەلۋشىنى ارنايى قۇتتىقتاپ، پلانشەت، قۇلاققاپ، ەكسپوعا ليميتسىز بيلەت جانە ەكسپونىڭ باستى تۇمارلارى - ساۋلە، قۋات، ءمولدىر سىندى ەستەلىك سىيلىقتاردى تابىستادى.

كەلۋشىلەر ەڭ كوپ تاماشالاعان پاۆيلوندار:

1. افريكا پلازاسى

2. ەگيپەت

3. تۇركيا

4. تايلاند

5. ازەربايجان

6. ءۇندىستان

7. رەسەي

8. وزبەكستان

9. جاپونيا

10. ساۋد ارابياسى كورولدىگى.

كورمە كەشەنىنىڭ ەڭ كوپ تاماشالانعان نىساندارى:

1. نۇر الەم

2. كوممەرتسيالىق پاۆيلوندار

3. شەلل بالالار زەرتحاناسى

4. تاقىرىپتىق س3.5 پاۆيلونى

5. بالالار باعى

6. امفيتەاتر

7. ديۋ سولەي تسيركى

8. تاقىرىپتىق س 2.4 پاۆيلونى

9. ارت- ورتالىق

10. شىعارماشىلىق ەنەرگيا ايماعى