الماتىدا 2017-جىلى وتەتىن ۋنيۆەرسياداعى چەحيانىڭ 127 وكىلى بار دەلەگاتسيا قاتىسادى
كەزدەسۋدە تاراپتار ساۋدا-ەكونوميكالىق جانە مادەني-گۋمانيتارلىق بايلانىستاردى ودان ءارى دامىتۋ ماسەلەلەرىن تالقىلادى. كەزدەسۋ بارىسىندا الماتى اكىمى الماتى مەن چەحيا اراسىنداعى ساۋدا بايلانىسى ۇستىمىزدەگى جىلدىڭ 10 ايى ىشىندە 76,3 ميلليون ا ق ش دوللارىنا ارتقانىن، مەگاپوليستە بىرىككەن 40 جانە چەحتىڭ كاپيتالىمەن جۇمىس ىستەيتىن 24 كاسىپورىننىڭ تىركەلگەندىگىن ايتتى.
ءوزىنىڭ سوزىندە ب. بايبەك 2015-جىلى قازاقستان الەمنىڭ 35 ەلى ءۇشىن ۆيزاسىز رەجيمدى ەنگىزگەنىن، 2017-جىلى ونىڭ 56 مەملەكەتكە جەتەتىنىن حابارلادى. «الماتى ەلىمىزدىڭ بارلىق تۋريستىك قىزمەتىنىڭ ` قامتاماسىز ەتەدى. مۇندا الەمدەگى بيىك تاۋ شاتقالىنداعى «مەدەۋ» مۇز ايدىنى، ماۋسىمىنا 120 مىڭ ادام كەلەتىن «شىمبۇلاق» تاۋ شاڭعىسى كۋرورتى بار، ءاربىر ەكىنشى شەتەلدىك تۋريست الماتىعا كەلەدى.
وتكەن جىلى الماتىدا چەحيانىڭ 1,5 مىڭ ازاماتى بولدى. كەلەر جىلدىڭ باسىندا 28-قىسقى ۋنيۆەرسيادا وتەدى، وعان قۇرامىندا 127 ادام بار چەحيا دەلەگاتسياسى دا قاتىسادى، ولاردىڭ 78 ءى اتلەتتەر»، - دەدى ب. بايبەك. چەحيا رەسپۋبليكاسىنىڭ سىرتقى ىستەر ءمينيسترى ليۋبومير زاورالەك ەكى ەل بيزنەسمەندەرەنىڭ ءتۇرلى سالالار بويىنشا ءوزارا بايلانىستارىنىڭ ارتىپ كەلە جاتقانىن ءسوز ەتتى.
«بيىل قازاقستان تاۋەلسىزدىگىنىڭ 25 جىلدىعىن اتاپ وتەدى. وسى قىسقا مەرزىم ىشىندە قازاقستاننىڭ زور ەلەۋلى تابىستارعا جەتكەنى تاڭداندىرادى. مەملەكەتتىڭ ەكونوميكالىق جانە ساياسي جاعىنان تۇراقتى بولۋى بيزنەس ءۇشىن وتە ماڭىزدى. سوندىقتان ءبىز سىزدەرمەن ىنتىماقتاستىقتى ودان ءارى نىعايتۋعا ىنتالىمىز»، - دەدى ل. زاورالەك. چەحيانىڭ وڭىرلىك دامۋ ءمينيسترى كارلا شلەحتوۆ ءوزىنىڭ سوزىندە قازاقستاننىڭ سولتۇستىگىنە بارعان ساپارلارىندا تەمپەراتۋرانىڭ كۇرت تومەندەگەنىن، وزگەلەرمەن سالىستىرعاندا الماتىنىڭ وتە اسەم قالا ەكەندىگىن ەرەكشە اتاپ ءوتتى.
مينيستر حانىم الماتىنىڭ تۋريستىك الەۋەتىنىڭ جوعارى ەكەنىن، قالاعا چەحيادان كەلەتىن تۋريستەر سانىنىڭ جىل سايىن ارتا تۇسەتىنىن ايتتى.