شەتەلدە تۇراتىن ءۇش قانداسىمىز «ريو-2016» جولداماسىن العان، سونىڭ ەكەۋى وليمپياداعا بارادى - فوتو
قازىر سول جولداما العان ءۇش سپورتشىنىڭ ەكەۋى ريو وليمپياداسىنا باراتىنى بەلگىلى.
ولاردىڭ ءبىرى قىتايدا تۋىپ-وسكەن قانداسىمىز ەرلانبەك كاتەي ۇلى. ول بيىل ناۋرىز ايىنىڭ ورتاسىندا استانادا وتكەن كۇرەستەن ريو وليمپياداسىنا ازيا ەلدەرى اراسىنداعى ىرىكتەۋ جارىسىندا جولداما ۇتىپ الدى.
ەرلانبەك كاتەي ۇلى قىتايدىڭ التاي ايماعىنا قاراستى قىزىلتاس قالاشىعىندا دۇنيەگە كەلگەن. ول 2010 -جىلى قىتاي بىرىنشىلىگىندە 65 كەلى سالماق دارەجەسى بويىنشا چەمپيون اتانىپ، وسى ەلدىڭ ۇلتتىق قۇراماسىنا الىنعان.
ەرلانبەك كاتەي ۇلى الەمدىك جارىستاردا قازاقستان بالۋاندارىمەن بىرنەشە رەت كەزدەسكەن. ول 2014 -جىلى وڭتۇستىك كورەيانىڭ ينچحون قالاسىندا وتكەن ازيا ويىندارىندا قولا مەدال يەلەنگەن.
وسى جارىستىڭ ءبىرىنشى اينالىمىندا ول قازاقستاندىق داۋرەن جۇماعازيەۆتى جەڭىپ، شيرەك فينالدا ءۇندىستاندىق، لوندون وليمپياداسى قولا جۇلدەگەرى يوگەشۆار دۋتتان جەڭىلىپ قالعان. ال قولاعا تالاستا سولتۇستىك كورەيالىق كان چين حۋكتى جەڭدى. بۇل ەرلانبەك كاتەي ۇلىنىڭ حالىقارالىق جارىستاعى العاشقى مەدالى ەدى.
ەستەرىڭىزگە سالا كەتەيىك، ەرلانبەك قىتايداعى قازاقتار اراسىنان وليمپياداعا بارا جاتقان ءۇشىنشى قانداسىمىز. وعان دەيىن گرەك- ريم كۇرەسىنەن ءالنۇر تورگە ۇلى، بوكستان قانات يسلام وليمپيادادا قىتاي اتىنان ونەر كورسەتكەن بولاتىن.
وزگە ەل اتىنان ريوعا باراتىن ەكىنشى قانداسىمىز - وزبەكستان قۇراماسىندا جاسىنداي جارقىراپ جۇرگەن ەرمۇرات تاسمۇراتوۆ.
ەرمۇرات باۋىرىمىز موڭعوليا استاناسى ۇلانباتىردا وتكەن كۇرەس تۇرلەرىنەن ريو وليمپياداسىنا ىرىكتەۋ باسەكەسىندە جولدامانى قانجىعاسىنا بايلادى. بۇل ونىڭ ەكىنشى قاتىسقالى وتىرعان وليمپياداسى. ول وسىدان ءتورت جىل بۇرىن لوندون وليمپياداسىنا قاتىسقان. الايدا، جەڭىس تۇعىرىنا جەتە المادى.
ەلمۇرات تاسمۇراتوۆ گرەك- ريم كۇرەسىنەن ازيانىڭ ءۇش دۇركىن چەمپيونى، سونداي-اق، الەم بىرىنشىلىگىنىڭ ەكى مارتە جۇلدەگەرى.
ول بەكزات ساتتارحانوۆ اتىنداعى سپورت ينتەرناتىنىڭ تۇلەگى. ۇلتتىق قۇراماعا قابىلدانا الماعاندىقتان، وزبەكستان اتىنان شىعىپ ءجۇر. ول 2010 -جىلى وزبەكستان ازاماتتىعىن العان. بيىل ريودا وزبەك ەلى قازاق بالاسىنان ۇلكەن ءۇمىت كۇتىپ وتىر.
ال ريوعا جولداما جەڭىپ الىپ، وكىنىشكە قاراي وليمپياداعا جولى بولماعان تاعى ءبىر قانداسىمىز بار. ول دا وزبەكستان ەلىندە بوكستان سول ەلدىڭ نامىسىن قورعاپ ءجۇر. ونىڭ ەسىمى - ەلنۇر ءابدىرايىموۆ.
ول 2015 -جىلى قازان ايىندا كاتار استاناسى دوحادا وتكەن بوكستان الەم چەمپيوناتىندا وزبەكستان قۇراماسىنا قولا جۇلدە سىيلاپ قانا قويماي، ريو وليمپياداسىنا جولداما جەڭىپ العان بولاتىن.
1994 -جىلى تاشكەنت وبلىسىنا قاراستى بوستاندىق اۋدانىندا دۇنيەگە كەلگەن. كەيبىر دەرەكتەرگە سۇيەنسەك، اكەسى نۇرعالي بوكستان جاتتىقتىرۋشى بولىپ قىزمەت ەتەدى.
ەلنۇر قازىر 60 كەلى سالماق دارەجەسىندە ونەر كورسەتىپ ءجۇر. وسى الەم بىرىنشىلىگىنە دەيىن بىرنەشە حالىقارالىق تۋرنيرلەردە جەڭىمپاز اتانعان.
الايدا وسى 60 كەلى سالماق دارەجەسىندە وزبەكستاننىڭ تاعى ءبىر بوكسشىسى حۋرشيد توجيبايەۆ APB جوباسى اياسىندا وليمپيادا جولداماسىنا قول جەتكىزەدى. سونىمەن جەرگىلىكتى باپكەرلەر كەڭەسى اقىلداسا كەلە، ەلنۇردى قالدىرىپ، توجيبايەۆتى وليمپياداعا اپاراتىن بولىپ شەشەدى. وسىلايشا قانداسىمىز جولداما جەڭىپ العانىمەن، وليمپياداعا بارا المايتىن بولدى.
ال جولداماعا تالاسىپ جاتقان ءتورتىنشى قانداسىمىز قۇرلىقتىڭ ارعى بەتىندە ءجۇر. ول وسىدان ەكى جىل بۇرىن برازيلياعا كەتكەن قازاقستاندىق بالۋان - مارات گاريپوۆ.
بۇل بالۋانىمىزدىڭ قازىر برازيليا قۇراماسىمەن بىرگە ەل ىشىندەگى سان- پاۋلۋ، ريو- دە- جانەيرودا وتەتىن بىرنەشە ىرىكتەۋگە قاتىسىپ جاتقانى تۋرالى اقپارات الدىق. دەمەك، ول جاقتا ىرىكتەۋ جارىستارى ءالى ءوتىپ جاتىر دەگەن ءسوز. ەگەر وسى سىنداردان سۇرىنبەي وتسە، بۇل باۋىرىمىزدى دا ريودا بوزكىلەم تورىنەن كورىپ قالۋىمىز عاجاپ ەمەس. جۋىقتا برازيليا كۇرەس فەدەراتسياسى مارات گاريپوۆتىڭ وسى ەلدىڭ ءتولقۇجاتىن العانىن راستاعان بولاتىن.
مىنە، ءبىزدىڭ قازاق سپورتشىلارى ءبىرى شەتەلدە تۋىپ، سول ەلدىڭ نامىسىن قورعاپ جۇرسە، ءبىرى ءوز ەلىندە تۋىپ، وزگە ەلدىڭ اتىنان سىنعا ءتۇسىپ ءجۇر. بۇل باۋىرلارىمىزعا قايدا جۇرسە دە، ساتتىلىك بولسىن دەپ تىلەيمىز!
اۆتور: كۇنسۇلتان وتارباي